Աշոտ Ղազարյանի 70-ամյակի տարեդարձի խնջույքը Երևանում, հայտնի հյուրերն ու տպավորիչ պատմությունները

    6162

    «Մեր քաղաքի գույնն ու ուրախությունը», «Մեր կյանքի ուրախությունը», «Մեր Աշոտը բարձր ա ու բոլորից քաղցր ա». այս ու բազմաթիվ այլ խոստովանություններով, մաղթանքներով ողողված պաստառն առաջինը մեզ «դիմավորեց» ՀՀ ժողովրդական արտիստ Աշոտ Ղազարյանի 70-ամյակի առթիվ կազմակերպված խնջույքին։

    Դերասանի համար այս տարին հոբելյանական է։ 70–ամյակի առթիվ նա նախ համերգ ունեցավ Կրեմլի լեփ–լեցուն դահլիճում, իսկ երեկ` բուն տարեդարձի օրը, խնջույք էր կազմակերպել Երևանում։ Հետաքրքիր զուգադիպությամբ հենց մայիսի 15–ին է ծնվել նաև դերասանի անվանակից թոռնիկը` Աշոտ Ղազարյան կրտսերը, որը երեկ տոնում էր 4–ամյակը։ Այնպես որ, պատահական չէր տոնական երկու տորթի առկայությունը։

    Tert.am Life–ը ներկա է եղել խնջույքին ու ներկայացնում է ամենահետաքրքիր դրվագներն ու ընկերների պատմություններն Աշոտ Ղազարյանի մասին։ Տարիներ շարունակ Աշոտ Ղազարյանի կողքին է եղել և ամեն հարցում աջակցել է կինը` տկն Մելանյան, որը երեկ էլ հետևում էր, որ ամեն ինչ լավ լինի ու ամուսինն անմոռանալի օր ունենա։

    Թոռները` Անահիտ և Բորիս Ադամյանները, որոնք վերջերս փայլուն ելույթ ունեցան ռուսական «Лучше всех!» նախագծում ևս երեկ Երևանում էին։ Նրանք էլ ոգևորված են պապով։ Անահիտն ասում է` հենց նա է նպաստել, որ իրենք կողմնորոշվեն այս ոլորտում։ Պապը միշտ իրենց օգնում է իր խորհուրդներով, իսկ ամենակարևոր բանը, որ սովորեցրել է իրենց, չմեծամտանալն է, անվանի դերասանը լավ գիտի` ժողովուրդը չի սիրում գոռոզներին։

    Առաջին հերթին, իհարկե, ուշադրության կենտրոնում դերասանի տարիքն է։ Տեսակով կենսուրախ ու եռանդուն դերասանն արտաքնապես էլ է ավելի երիտասարդ երևում։ Քչերն են պատկերացնում, որ նա 70 տարեկան է։ Ինքն էլ իրեն մեծ չի ընկալում։

    Ասում է,  երբ աշխատանքային հագեցած գրաֆիկի ընթացքում հարցնում են` հո չի հոգնել, կատակում է` «ես հո ջահել չեմ, որ հոգնեմ»։ Դերասանի ուժն ու ոգևորությունը տեղում են։ Այս տարի ոչ միայն հոբելյանական համերգներ կունենա, այլև դեբյուտ ունի` առաջին անգամ նկարահանվում է հեռուստասերիալում։ Նկարահանման հրապարակի հանդեպ կարոտին ու ոգևորությամբ նոր աշխատանքի անցնելուն Tert.am Life–ը դեռ կանդրադառնա, իսկ առայժմ կներկայացնենք նրա 70-ամյակի երեկույթն ու ընկերների պատմությունները։

    Աշոտ Ղազարյանի տարիքն անակնկալի է բերել նույնիսկ վաղեմի ընկերոջը` երգչուհի Նունե Եսայանին։ Ասում է, երբ դերասան իրեն առաջարկեց մասնակցել իր հոբելյանական համերգին ու ասաց, որ 70 տարեկան է դառնում, ուզում էր անջատել հեռախոսը, տարիքն անհավատալի էր. «Ասացի, որ սիրով կմասնակցեմ, բայց երբ տարիքն իմացա, մտածեցի` կատակում է։ Նրա հետ ընկերներ ենք և երբեք չի եղել զգացողություն, որ մեզնից մեծ է, մտածում էի` հիսուն տարեկանի սահմաններում պետք է լինի»։

    Նունե Եսայանը դժվարացավ մտաբերել, թե երբ ու ինչպես են ծանոթացել, բայց շեշտեց, որ իրենց ընկերությունը 20 և ավելի տարվա պատմություն ունի։ Երգչուհու խոսքով` Աշոտ Ղազարյանի հետ կապված բոլոր դրվագներն էլ հետաքրքիր են, բայց ինքը կարող է նրա մասին անսպասելի բացահայտում անել։ «Որքան էլ զարմանալի է, Աշոտին կբնորոշեմ որպես ամաչկոտ, զուսպ, համեստ մարդու։ Թվում է` նա շատ բաց պետք է լինի, բայց իրականում շատ նուրբ մարդ է,– նկատեց երգչուհին ու առողջություն մաղթեց ընկերոջը,– մեր պարգևն է, որ նա բեմում լինի և ոչ մի խանգարող հանգամանք չլինի իր ստեղծագործելուն»։

    Դերասանուհի Լալա Մնացականյանն ու ամուսինը` նկարիչ Աշոտ Համբարձումյանը, մաղթանքների համար նախատեսված պոստերին գրել էին, որ դերասանի 100–ամյակին էլ են ներկա լինելու։ Դերասանուհին շեշտեց, որ Աշոտ Ղազարյանն իր հուսալի ընկերներից մեկն է. «Նա իմ այն ընկերներից է, որի դեպքում վստահ եմ` երբեք որևէ հարցում մերժում չեմ ստանա»։

    Դերասանի հետ կապված ամենատպավորիչ դրվագը Լալա Մնացականյանի համար նրա ծանոթությունն է իր դստեր հետ. ««Մեր բակ 1»–ն էինք նկարահանում, աղջիկս` Մանեն, դեռ փոքր էր, ինձ հետ եկել էր նկարահանման հրապարակ, տեսավ Աշոտին, ասաց` վա՜յ, Աշոտ Ղազարյանն է, մեկ էլ լռեց, հետո ասաց` բայց ինչո՞ւ է տխուր, ինքը պետք է միշտ ուրախ լինի։ Այդ պահին Աշոտը կենտրոնացած դեմքով տեքստ էր կարդում։ Մոտեցա, ասացի` Աշոտ ջան, ցավդ տանեմ, դու պետք է ուրախ դեմքով նստես, որովհետև մարդիկ քեզ որպես ուրախ Աշոտ Ղազարյանի  գիտեն, հատկապես, աղջիկս շատ է ուզում քեզ ուրախ տեսնել։ Մեկ էլ Աշոտը սկսեց տեքստը ծիծաղելով կարդալ։ Վերջում աղջիկս ասաց` իր տխրության մեջ էլ ուրախություն կա»։

    Հրանտ Թոխատյանն էլ շեշտեց` Աշոտ Ղազարյանի հետ բոլոր  պատմությունները հետաքրքիր են, բայց պետք է առանձնացնել նրա մարդկային տեսակը։ «Աշոտն իմ տեսած ամենաբարի մարդկանցից մեկն է, ամենահասնողը։ Եթե անգամ իրեն չասես, որ քեզ ինչ–որ բան է պատահել, չգիտես ինչպես, զգում է ու անմիջապես հայտնվում է կողքիդ,– ասաց դերասանն ու հավելեց, որ ընկերոջից շատ բան է սովորել,– Աշոտից սովորել եմ, թե ինչպես լինել լավ պապիկ, ինչպես սիրել աշխատանքն ու ինչ պատասխանատվությամբ մոտենալ արածդ գործին` անկախ դրա  մեծությունից, դժվարությունից կամ հեշտությունից։ Պետք է հետևել Աշոտին բեմելից առաջ, զարմանալի պրոցես է, դա էլ է մի ներկայացում ոչ միայն լարվածության, այլև հանդիսատեսի առաջ ունեցած պատասխանատվության առումով։ Դա շատ կարևոր բան է, որը, ցավոք,  ոչ բոլորիս մոտ է պահպանվել։ Պրոֆեսիոնալ տեսանկյունից նա մեր ամենահին դերասաններից է, ցավոք, իրենից ավելի հները մեզ հետ չեն։ Աշոտի` իր ասպարեզում ունեցած վարպետության վրա շատ մարդիկ են դաստիարակվել, նույնիսկ, փորձել են իր արածը «հղկել» ու «իրենցով անել»։ Կարծում եմ` Աշոտ Ղազարյանն իր տեսակի մեջ ավելի շատ պետք է գնահատված լինի»։

    Դերասանից հետաքրքրվեցինք, թե զբաղվածության մեջ հիմա որքանով են հասցնում շփվել իրար հետ։ Բացի ընկերությունից այստեղ մեծ ներդրում ունի հյուրասեր տկն Մելանյան, որը, ինչպես պարզվեց, լավ խոհարար է. «Մելանյան պատրաստում է աշխարհի ամենահամեղ դոլման, իրենց հետ պետք է միշտ շփվել, ինչը փորձում եմ անել»։

    Լուսանկարները՝ Էլեն Գասպարյանի

    Աղբյուրը՝ Life.tert.am
    Facebook Comments