Հարավային Կորեայի դպրոցները սկսել են K-pop-ը ներառել դպրոցական ծրագրում. այս մասին հայտնում է ABC News-ը։
Քվանգչոնի միջնակարգ դպրոցը՝ Չունգամի նահանգի կրթության վարչության թույլտվությամբ վերափոխեց իր ուսումնական ծրագիրը` մասնագիտանալով ազգային փոփ երաժշտության մեջ: Ավելին, հաստատությունը վերանվանվել է K-pop և կատարողական արվեստի ավագ դպրոց: Դպրոցի տնօրեն Պարկ Բոյունգ Կյուն նշեց, որ նպատակ չունի «աստղեր ստեղծել», այլ «նպատակ ունի ուսանողներին հնարավորություն տալ բացահայտել իրենց ուժեղ կողմերը, որպեսզի կարողանան լրացնել միլիոնավոր ազատ աշխատատեղերի բացը, որոնք առկա են գլոբալ իմաստով ընդլայնվող K-pop-ում»:
Դպրոցը տարածաշրջանային կառավարությունից ստացել է ավելի քան 10 միլիոն ԱՄՆ դոլարի ներդրում:
Կան նաև մի շարք հիմնական դպրոցներ, որոնցում K-pop-ը դարձել է գիտական առարկա ինչպես տարրական, այնպես էլ միջին դասարաններում:
K-pop ինդուստրիայի զարգացման նկատմամբ հետաքրքրությունն առաջացել է հարավկորեական BTS տղաների խմբի հաջողությունից, որոնք անցած ամառ գլխավորեցին Billboard Hot 100 հիթ-շքերթները իրենց առաջին անգլերեն «Dynamite» երգով: Դրանից հետո Հարավային Կորեայի մշակույթի, սպորտի և զբոսաշրջության նախարարությունը հրապարակեց վերլուծական զեկույց, որում նշվում էր, որ երգը երկիրին $ 1,5 միլիարդի շահույթ է բերել:
2020 թվականի դեկտեմբերին Հարավային Կորեայի խորհրդարանը օրենք ընդունեց, համաձայն որի՝ K-pop խմբերի հայտնի անդամները բանակից հետաձգում կստանան մինչև 30 տարեկան դառնալը: Համաձայն Հարավային Կորեայի օրենսդրության, 18-ից 28 տարեկան բոլոր աշխատունակ երիտասարդները պարտավոր են ծառայել բանակում մոտ 20 ամիս: Բացառություն էին կազմում միայն ամենահայտնի նկարիչները, դասական երաժշտության կատարողները և մարզիկները: Նոր օրենքի համաձայն, բացառություն կտրվի նաև ժողովրդական մշակույթի հաջողակ ներկայացուցիչներին:
