Ստեփանակերտի Վերածննդի հրապարակում երեկ կայացել է երգիչ Անդրեի հանդիպումը. Անդրեի համերգի «պաստառը պատռած տղամարդը» նույնպես ներկա է եղել հանդիպմանը։ Երգիչը ֆեյսբուքյան իր էջի Story բաժնում լուսանկար է հրապարակել տղամարդու հետ։
Նշենք, որ նախապես հայտարարվել էր, որ Անդրեն պետք է համերգ ունենա Ստեփանակերտում։ Սակայն համերգի մասին լուրերը մեծ աղմուկ էր բարձրացրել, որից հետո Անդրեի պաստառն անհետ կորած զինծառայողներից մեկի ծնողը պոկել էր՝ ասելով․ «Խոխիս կպիրաք, նոր կանցերտ կտաք»։
Համերգի փոխարեն Արցախի մայրաքաղաքում երեկ հանդիպում է կայացել, որտեղ հավաքվածներն ու Անդրեն կատարել են Արցախի հիմնը և «Արցախի հորովելը»։ Երգիչը խոստացել է համերգով հանդես գալ նոյեմբեր ամսին, որպեսզի հայկական երաժշտությունը լսելի լինի նաև Շուշիում։
Հիշեցնենք, որ Արցախի պետական նախարար Արտակ Բեգլարյանն այս առիթով Facebook-ում նշել էր, որ Արցախում առնվազն մինչև նոյեմբերի 11-ը որևէ համերգ չի կազմակերպվելու։
