Մենք Ձեր կյանքի մի մասն էինք, իսկ դուք մեր… և այսօր մենք փակվում ենք․ Պետական կամերային երաժշտական թատրոնը հանդես է եկել հայտարարությամբ

Պետական կամերային երաժշտական թատրոնը հանդես է եկել հայտարարությամբ, որում ասվում է, որ թատրոնի շենքում այլևս ներկայացումներ չեն խաղալու և որ թատրոնը փակվում է, քանի որ ըստ ԿԳՄՍ նախարարության որոշաման՝ այն պետք է միանա Հակոբ Պարոնյանի անվան կոմեդիայի երաժշտական թատրոնին։

«Սիրելի հանդիսատես,
Մեր թատրոնի շենքում այլևս ներկայացումներ չենք խաղալու:
Գործունեության 33 տարիների ընթացքում մեր թատրոնն ունեցել է բազում նվաճումներ, մեծ պրեմիերաներ, հյուրախաղեր և, ամենակարևորը, վայելել է հանդիսատեսի մեծ սերն ու համակրանքը:
Մենք Ձեր և Ձեր փոքրիկների կյանքի մի մասն էինք, իսկ դուք մեր… և այսօր մենք փակվում ենք:
ՀՀ կառավարության 2021 թվականի սեպտեմբերի 8-ի № 1472-Ա որոշման համաձայն «Պետական կամերային երաժշտական թատրոն» ՊՈԱԿ-ը միացման ձևով վերակազմակերպվում է և միանում է «Հ. Պարոնյանի անվան երաժշտական կոմեդիայի պետական թատրոն» ՊՈԱԿ-ին:
Թատրոնի շենքի տարածքը փոխանցվում է սիմֆոնիկ նվագախմբին, որպես փորձասենյակ:
Վստահ ենք, որ մեր թատրոնի տաղանդաշատ երիտասարդ դերասաններին դեռ կտեսնեք մեծ բեմերում:
ՄԵնք Ձեզ շատ սիրում ենք։
Շնորհակալ ենք մեր կողքին լինելու համար»,- նշված է հայտարարության մեջ։