Արքայադուստր Դիանայի կենսագիրը պատմել է արքայազներ Հարրիի և Ուիլյամի դժվար մանկության մասին

Մեծ Բրիտանիայում լույս կտեսնի լրագրող, արքայադուստր Դիանայի մասին կենսագրական գրքերի հեղինակ Թինա Բրաունի «Պալատի փաստաթղթերը» նոր գիրքը: Գիրքը վաճառքում կհայտնվի երեքշաբթի՝ ապրիլի 26-ին, գրում է «Գազետա.ռու»-ն՝ հղում անելով «Page Six» պորտալին:

Մասնավորապես, լրագրողը պատմել է, որ արքայազներ Ուիլյամն ու Հարրին ծանր են տարել հոր՝ արքայազն Չարլզի և մոր՝ արքայադուստր Դիանայի վեճերը:

«Մի օր Հարրին սկսել է իր փոքրիկ բռունցքներով խփել հոր ոտքերին և բղավել. «Ատում եմ, ատում եմ քեզ: Մայրիկը քո պատճառով լաց է լինում»,- գրել է Թինա Բրաունը:

Լրագրողի խոսքով՝ երեխաները նաև տուժել են մոր քմահաճ բնավորության պատճառով։
«Նրանք սովոր են, որ այն մարդկանց, ում սիրում էին, հանկարծակի անհետանում էին կամ կորցնում էին իրենց հանդեպ բարեհաճությունը», – ասում է թագավորական կենսագիրը:

Նա պատմել է, որ մի անգամ եղբայրների հետ չեն ցանկացել շփել նրանց զարմուհիները՝ արքայադուստր Բեատրիսը և Եվգենիան, քանի որ Դիանան դադարել է խոսել իրենց մոր՝ Սառա Ֆերգյուսոնի հետ:

Գրքի հեղինակը նաև հայտնել է, որ 1997 թվականին արքայադուստր Դիանայի մահվանից հետո նրա կրտսեր որդին՝ արքայազն Հարրին չի կարողացել կենտրոնանալ ուսման վրա և հաճախ կռվի մեջ է ներքաշվել։Ավելի ուշ, երիտասարդության տարիներին, մոր վիշտը նրա մոտ ալկոհոլի հետ կապված խնդիրներ է առաջացրել, ասել է Թինա Բրաունը: