Հոլիվուդյան դերասանուհի Մեգան Ֆոքսը Glamour ամսագրին տված հարցազրույցում պատմել է երեք որդիներից մեկի՝ Նոայի մասին, որը աղջիկների համար նախատեսված հագուստ է կրում: Հոլիվուդյան գեղեցկուհու խոսքով՝ ինքը որդիներին խրախուսում է հագուստի միջոցով ինքնարտահայտվել այնպես, ինչպես որ նրանք ցանկանում են՝ վստահեցնելով, որ դա որևէ կապ չունի նրանց սեռականության հետ:
35-ամյա Ֆոքսը խոստովանել է, որ 9-ամյա Նոան տառապում է: Մոր խոսքով՝ որդուն օգնելու համար նա գնում է տրանսգենդեր երեխաների կողմից գրված գրքեր: Ֆոքսը ցանկանում է, որ տղաները, կրելով իրենց ցանկացած հագուստը, իրենց տարօրինակ կամ տարբերվող չզգան:
«Ես գնել եմ գրքեր, որոնք անդրադառնում են այս բաներին: Գրքերի մի մասը գրված է տրանսգենդեր երեխաների կողմից: Որոշ գրքեր միայն այն մասին են, թե ինչպես կարելի է տղա լինել և զգեստ հագնել. դուք կարող եք ինքաարտահայտվել ձեր հագուստի միջոցով, ինչպես ուզում եք: Եվ դա նույնիսկ կապ չունի ձեր սեռականության հետ: Ես իսկապես տառապող երեխա ունեմ: Ուստի ես շատ անհանգստություններ ունեմ դրա հետ կապված, քանի որ պարզապես կցանկանայի, որ մարդկությունն այսպիսին չլիներ: Չնայած իմ երեխան այնքան համարձակ է… Պարզապես դժվար է որպես մայր», – պատմել է Ֆոքսը:
Դերասանուհին ավելի վաղ հայտնել էր, որ Նոային դպրոցում այլ տղաները երբեմն ծաղրում են զգեստներ հագնելու համար: