Երևանի Կ. Ստանիսլավսկու անվան ռուսական դրամատիկական թատրոնի խաղացանկը կհամալրի Ա. Պ. Չեխովի «Բալենու այգին» կատակերգությունը` թատրոնի գեղարվեստական ղեկավար Կարեն Ներսիսյանի ռեժիսուրայով: Այս մասին տեղեկանում ենք թատրոնի մամուլի ծառայությունից։
«Բալենու այգին» պիեսը՝ Չեխովի գլուխգործոցը, ստեղծվել է գրողի կյանքի վերջին տարում: Այն իրավամբ կարող է համարվել մեծ դրամատուրգի հրաժեշտի ուղերձը մարդկանց:
Չեխովի «Բալենու այգին» կատակերգության բոլոր հերոսները՝ կրքոտ, բարի, պարզամիտ, զվարճալի, առատաձեռն, արատավոր, տարօրինակ, առանց բացառության, ծնվել են սիրո մեջ: Նրանք զվարճալի են և հուզիչ: Նրանց աշխարհը փլուզվում է, իսկ վերահաս աղետին դեմ հանդիման նրանք ապրում են ագահաբար, ուրախ, հուսահատ. սիրում են, վիճում, արտասվում, տրվում խրախճանքի:
Ներկայացման դերակատարներն են ՀՀ վաստակավոր արտիստ Աննա Բալանդինան, Աննա Մանուչարյանը, Յանա Թուրգունյանը, Թեհմինե Խաչատրյանը, Հռիփսիմե Նահապետյանը, ՀՀ վաստակավոր արտիստ Արտաշես Շահվերդյանը, Արմեն Մարգարյանը, Ալեքսանդր Հայրապետովը, Լև Նալբանդյանը, Լալիտա Բուկիան, Վազգեն Հովհաննիսյանը, Հայարփի Զուռնաչյանը, Մելսիդա Հակոբյանը, Վյաչեսլավ Շամիրյանը, Էրվին Ամիրյանը, Արթուր Պետրոսյանը, Անտոն Աղաջանյանը։
Ներկայացման բեմանկարիչը Կիրիլ Դանիլովն է (Մոսկվա), զգեստների նկարիչը` Յանինա Կրեմերը (Մոսկվա), խորեոգրաֆիան`Նունե Կիրակոսյանի, երաժշտական ձևավորումը՝ Կարեն Ներսիսյանի:
Ներկայացումը նախատեսված է 16+ անձանց համար: Առաջնախաղերը կկայանան մայիսի 7-ին և 8-ին:
