Ապրիլի կեսերին Վիրջինիա նահանգի Ֆերֆաքս քաղաքում դատական հայց է սկսվել Ջոնի Դեփի և Էմբեր Հերդի միջև։ Դերասանը նախկին կնոջ դեմ դատական հայց է ներկայացրել դեռևս 2019 թվականին, պատճառը եղել է The Washington Post-ի հոդվածը, որտեղ նա իրեն ընտանեկան բռնության զոհ է անվանել։ Դեփն այս խոսքերը համարել է զրպարտություն և կնոջից պահանջել է 50 մլն դոլար, իսկ Հերդը 100 մլն դոլարի հակընդդեմ հայց է ներկայացրել։ Գրեթե չորս շաբաթ աստղերը ցուցմունքներ են տվել՝ հիշելով հին կոնֆլիկտները և բարձրաձայնելով իրենց դժվար ամուսնության նոր մանրամասները, մինչդեռ դատարանի դահլիճից կադրերն ու մեջբերումներն ակնթարթորեն հայտնվել են սոցիալական ցանցերում՝ վերածվելով մեմերի և առաջացնելով ավելի շատ հակասություններ ու քննարկումներ ֆիզիկական և էմոցիոնալ բռնության մասին:
Ապրիլի 19-ին Ջոնի Դեփը ելույթ ունեցավ հանդիպման ժամանակ և պատմեց Էմբեր Հերդի հետ հարաբերությունների իր տարբերակը. նրա ելույթը տևեց գրեթե երեք ժամ: Նա խոստովանել է, որ ցնցվել է, երբ նախկին կինը հոդված է հրապարակել, որտեղ նա բազմաթիվ «բավականին նողկալի ու մտահոգիչ» մեղադրանքներ է հնչեցրել։ Դերասանը շեշտել է, որ կյանքում երբեք կնոջ չի ծեծել, ինչպես նաև նշել է, որ իրեն անհրաժեշտ է պաշտպանել իր շահերը և փորձել վերականգնել իր կարիերան։
Իր խոսքում Դեփը նաև մեկնաբանել է նախկին կնոջ խոսքերը թմրամիջոցների հետ կապված իր խնդիրների մասին՝ ընդգծելով, որ այդ հայտարարություններից շատերը սուտ են և նշել է, որ իր կախվածության թեման հեշտ թիրախ է դարձել Հերդի համար։ Նա նաև պատմել է, որ առաջին անգամ հոգեմետ նյութեր է օգտագործել 11 տարեկանում, իսկ 15 տարեկանում փորձել է գրեթե բոլոր թմրանյութերը։ Միևնույն ժամանակ, ըստ նրա, վերջին տարիներին ինքը որևէ կախվածություն չի ունեցել և դրանց օգտագործումը որևէ կերպ չի ազդել աշխատանքային գործընթացի վրա (Հերդի պաշտպանությունը հակառակն է պնդում: Կինը շեշտում է, որ Դեփի կարիերան տուժել է ապօրինի թմրանյութերի չարաշահումների պատճառով։):
Դեփի կողքին էր նրա թիկնապահ Մալքոլմ Քոնոլին։ Նրա խոսքով՝ արտիստը բավականին համբերատար է եղել նախկին կնոջ հետ հարաբերություններում, իսկ իրենց հարաբերությունների սկզբում նա իսկապես երջանիկ տեսք ուներ։
Դեփի մեկ այլ թիկնապահը՝ Շոն Բեթը, ապացույցներ է ներկայացրել դերասանուհու կողմից ամուսնուն բռնության ենթարկելու մասին. նա դատարանում ցույց է տվել ծեծված դերասանի նկարներ և համոզել է աստղին ձայնագրել այդ ապացույցը, եթե Հերդը հանկարծ որոշի մեղադրանք առաջադրել Դեփի դեմ։ Բեթը նաև հավելել է, որ դերասանուհու վրա նման վնասվածքներ չի տեսել: Էմբեր Հերդի նախկին օգնական Քեյթ Ջեյմսը հաստատել է, որ Հերդը ծեծի նշաններ չի ունեցել, ինչպես նաև համաձայնել է, որ դերասանուհին հակված է ագրեսիայի: Կինը հաճախ է ձայնը բարձրացրել Ջեյմսի վրա և վիրավորել նրան, և հաճախ այդ խոսակցությունները տեղի են ունեցել գիշերը։ Երբ օգնականը աշխատավարձի բարձրացում է խնդրել, դերասանուհին ցանկացել է թքել նրա երեսին։
Դատավարության ընթացքում Հերդը նախկին ամուսնուն բազմիցս անվանել է իր կյանքի սերը, սակայն ընդգծել է, որ, կախված օգտագործվող նյութերից, իր առջև հաճախ է հայտնվել ինչ-որ այլ մարդ։ Ժամանակ առ ժամանակ դերասանն ընդհանրապես անհետանում էր, իսկ վերադառնալուց հետո ներողություն էր խնդրում իր պահվածքի համար: Նման պահերին զույգի հարաբերությունները բարելավվում էին, բայց՝ կարճ ժամանակով:
Հերդն ասել է, որ թմրանյութերն ու ալկոհոլը միակ խնդիրը չեն իրենց ամուսնության մեջ։ Նա պնդում է, որ հարսանիքից անմիջապես հետո Դեփը խաբել է իրեն, ինչի մասին կինն իմացել է նրա հեռախոսի հաղորդագրություններից։ Հերդը բացատրել է, որ դերասանը կապ է ունեցել այլ կնոջ հետ հարսանիքից առաջ, իսկ ամուսնությունից հետո գնացել է նրա տուն։ Միևնույն ժամանակ, չնայած իր դավաճանություններին, ինքը՝ Դեփը, խանդում էր կնոջը, արգելում էր նրան բաց տեսարաններում խաղալ և ասում, որ նա աշխատելու կարիք չունի։ Դերասանուհին նշում էր, որ այդ վերահսկողութան պատճառով ստիպված է եղել հրաժարվել հետաքրքիր դերերից։
