Մայլի Սայրուսին դատի են տվել պապարացիի արած լուսանկարն օգտագործելու համար. լուսանկարիչ Ռոբերտ Բարբերան երգչուհու սոցցանցում հայտնաբերել է վերջինիս լուսանկարը, որն արվել է իր կողմից՝ անցյալ տարի։ Այս մասին հայտնում է Bloomberg Law-ը։
Լուսանկարիչը պնդում է, որ Սայրուսը խախտում է հեղինակային իրավունքները՝ երգչուհին թույլտվություն չի ստացել լուսանկարը հրապարակելու և պաշտոնապես չի գնել այն։ Այս կապակցությամբ Բարբերան որոշել է դատի տալ Մայլիին։ Փաստաթղթերում ասվում է, որ, ըստ լուսանկարչի, երգչուհին ֆինանսապես շահ է ունեցել հեղինակային իրավունքը խախտող նկարի հրապարակումից, ինչը նաև մեծացրել է նրա օգտահաշվի թրաֆիկը և երաժշտության վաճառքից ստացված եկամուտը:
Նա նշում է, որ «լուսանկարի ոչ ճիշտ օգտագործումը խաթարել է, եթե ոչ ոչնչացրել, լուսանկարներ վաճառելու հնարավորությունը»։ Ռոբերտ Բարբերան փոխհատուցում է պահանջում։
Ի դեպ, այս տարի նույն լուսանկարիչը դատի է տվել Դուա Լիպային՝ իր նկարն օգտագործելու համար։ Հետո նրանց հաջողվել է հարցը լուծել արտադատական կարգով՝ երգիչը պարզապես ջնջել է Ռոբերտ Բարբերի նկարը։ Նույն հարցը նա փորձել է դատարանների միջոցով լուծել նաև Ջասթին Բիբերի և Արինա Գրանդեի հետ։
