Գվինեթ Փելթրոուին կարող ենք շնորհավորել։ Variety-ի փոխանցմամբ՝ Յուտայի դատարանն այս գիշեր արդարացրել է դերասանուհուն դահուկային վթարի գործով։ Նա ստացել է մեկ դոլար, որը պահանջվել է իր հայցով:
Դատավարությունը շարունակվում էր վերջին երկու շաբաթվա ընթացքում։ Ինչպես ավելի վաղ գրել էինք, Յուտայի բնակիչ Թերի Սանդերսոնը դատի էր տվել Գվինեթ Փելթրոուին՝ 2016 թվականին դահուկներով սահելիս բախվելու և նրան տապալելու համար: Արդյունքում Սանդերսոնը կողոսկրերի չորս կոտրվածք և գլխի վնասվածք էր ստացել։ Տղամարդը 3 միլիոն դոլարի վնասի փոխհատուցում էր պահանջել։ Այդ ամենից հետո դերասանուհին հակընդդեմ հայց էր ներկայացրել՝ ասելով, որ ոչ թե ինքն է բախվել տղամարդուն, այլ տղամարդն է բախվել իրեն դահուկ վարելիս։
Ի դեպ, այս դատավարությունը դարձել է վերջին ժամանակների ամենաքննարկվողներից մեկը։ Առաջին հերթին դա պայմանավորված է Գվինեթի կերպարներով, որոնք նա խնամքով ընտրել է յուրաքանչյուր լսումների համար։ Ի դեպ, դրանք ոչ բոլորին են դուր եկել։ Ոչ վաղ անցյալում նրան քննադատում էին ընտրված հագուստի համար։
