«Ես հրաժարվել եմ Վաստակավոր արտիստի կոչումից». Գարիկ Պապոյան  

«Իմ արմատները Հայաստանում գնալով այնքան եմ խորացնում, որ նույնիսկ, եթե այնպիսի պահ լինի, որ համարյա ստիպված լինեմ գնալ, այնքան բարդ փուլ պիտի լինի, որ երբ այդ դեպրեսիան հաղթահարեմ, նորից կվերադառնամ: Իմ երեխաների ուսումը, պատկերացումները այնքան հայկական են, մեր հետագա նպատակները այնքան եմ Հայաստանի հետ կապում, որ հայրենիքը լքելու հարցը, եթե իմ մոտ մի օր առաջանա, դա կլինի ինչ-որ երկրից աշխատանքային առաջարկով գնալ, նորից վերադառնալու սկզբունքով: Չեմ մեղադրում գանացողներին, բայց ինձ համար պատիվ է ունենալ մարդկանցից այն վերաբերմունքը, որն այսօր ունեմ, նման բանից հրաժարվել ու գնալ մի երկրում օտարիկամ հյուրի պես ապրել, չգիտեմ դանակը որքան պիտի ոսկորին հասնի, որ անեմ:

Չեմ էլ ուզում մտածել դրա մասին: Չեմ էլ ուզում, որ մեր երկիրը դառնա այնպիսին, որ ճիշտ խոսելու համար քեզ ու ընտանիքիդ այնպես վնասեն, որ ստիպված լինես գնալ»,- «VTV» յութուբյան ալիքի «Հարցեր կան հարցեր» հաղորդման շրջանակներում ասել է հումորիստ, երաժիշտ Գարիկ Պապոյանը:

Նա անդրադառնալով կոչումներին, անկեղծացել է, որ 3 տարի առաջ իրեն առաջարկել են ՀՀ վաստակավոր արտիստի կոչում, որից հրաժարվել է, քանի որ դրա իմաստը չի հասկանում:

«Գնահատականի այդ տեսակը ես չեմ հասկանում, որպես պետական պարգև չափորոշիչներ պետք է ունենալ: Վաստակավոր արտիստի չափորոշիչը ես, իրոք, չեմ հասկացել:

Ես շատ շնորհքով ասել եմ, շնորհակալ եմ, բայց այս տարին իմ ամենաակտիվ տարին չէր: Ինչի՞ համար են տալիս: Ինձ մոտ տպավորություն էր, որ իմ հերթն էր հասել, տալիս էին: Քանակ կա, որ պիտի լրացնեն, հասան Պ տառին՝ Պապոյան, ես դրանից լավ չեմ զգացել, հրաժարվել եմ»,- անկեղծացել է Գարիկ Պապոյանը: