Ամերիկյան Billboard ռադիոհիթերի պատմության մեջ առաջին անգամ հայտնվել է մի արտիստ, որը գոյություն չունի իրական կյանքում: Արհեստական բանականության կողմից ստեղծված վիրտուալ արտիստ Քսանիա Մոնեն դեբյուտ է կատարել հեղինակավոր Adult R&B Airplay հիթ-շքերթի 30-րդ հորիզոնականում։
Ըստ Oddity Central-ի՝ Քսանիան հիթ-շքերթում հայտնվել է իր «How Was I Supposed to Know?» երգի շնորհիվ, որը հնչել է հիթ-շքերթը կազմող 57 ռադիոկայաններից 15-ի կողմից։
Քսանիա Մոնեն Միսիսիպիի բանաստեղծ և երգահան Թելիշա «Նիկի» Ջոնսի գաղափարն է, որը գրում է երգերի տեքստեր և օգտագործում է Suno AI հարթակը՝ դրանք երաժշտության վերածելու համար: Արտիստը նախատեսված է մարդկային հույզերը թվային մեդիայի միջոցով փոխանցելու համար։
«Մենք օգտագործեցինք արհեստական բանականությունը՝ մեր արվեստը կատարելագործելու համար: Մենք ինքներս ստեղծեցինք R&B երաժշտություն և տեքստեր՝ հիմնվելով իրական կյանքի փորձի և դասերի վրա: Արհեստական բանականությունը օգնեց մեզ սա կյանքի կոչել և կիսվել աշխարհի հետ: Բայց արվեստն ու իմաստը բացառապես մարդկային են»,- ընդգծել է Քսանիա Մոնեի մենեջերը։
