Հայաստանի Հանրապետության վաստակավոր արտիստներից ոմանք նախորդ տարի մեր երկրում տեղի ունեցած հեղափոխության օրերին հայտարարեցին, որ հրաժարվում են իրենց կոչումներից ու ոսկե մեդալներից:
Ապրիլի 22-ին՝ այդ ժամանակ դեռեւս պատգամավորներ Նիկոլ Փաշինյանի, Արարատ Միրզոյանի և Սասուն Միքայելյանի ձերբակալումներից հետո, ՀՀ մշակույթի վաստակավոր գործչի կոչումից հրաժարվելու հայտարարությամբ հանդես եկան դերասան Մկրտիչ Արզումանյանը, երգչուհի Էռնա Յուզբաշյանն ու «Կադանս» երաժշտության կենտրոնի հիմնադիր, գործադիր տնօրեն ու պրոդյուսեր Նիկա Բաբայանը:
«Հայկական ժամանակ»-ից տեղեկանում ենք, որ 2017 թվականին նախագահ Սերժ Սարգսյանի կողմից ՀՀ վաստակավոր արտիստի կոչման արժանացած Մկրտիչ Արզումանյանը չգիտի, թե ինչպիսին է կոչումից հրաժարվելու ընթացակարգը և ինչ պետք է անի: Դերասանի խոսքով՝ այս ընթացքում ժամանակ էլ չի ունեցել դրանով զբաղվելու, սակայն կոչումից հրաժարվելու իր որոշումը միանշանակ է:
«Պրոտոկոլին չեմ հետևել: Ես հիմա այնքան ծանրաբեռնված եմ, որ հազիվ հասցնում եմ մի քանի ժամ քնել հանգստանալ ու աշխատել: Երբեք չեմ էլ սպասել, որ ինձ այդ կոչումը տան. ո՛չ ստանալուց է հուզել, ո՛չ էլ՝ վերադարձնելուց: Շարունակում եմ աշխատել. ինձ համար ժողովրդի գնահատականը շատ կարևոր է, որի համար անընդհատ աշխատում եմ»,- ասել է դերասանը:
Նշենք, որ կոչումից հրաժարվելու մասին դերասանը գրառում էր կատարել իր ֆեյսբուքյան էջում: «Անընդունելի եմ համարում ուժի կիրառումն անզեն ու խաղաղ ժողովրդի նկատմամբ: Դատապարտում եմ իշխանության բռնի գործողությունները հայրենակիցներիս հանդեպ։ Հրաժարվում եմ այս կոչումից»,- նշել էր նա:
«Կադանս» երաժշտության կենտրոնի հիմնադիր, գործադիր տնօրեն ու պրոդյուսեր Նիկա Բաբայանն էլ է հայտնել, որ կոչումից հրաժարվելու դիմումը հանձնել է նախագահական, որտեղից իրեն բացատրել են ընթացակարգը: Ավելի ուշ նախագահականի աշխատողներից մեկը հայտնել է, որ նախագահ Արմեն Սարգսյանը ցանկանում է Բաբայանի հետ զրուցել, սակայն հանդիպումը չի կայացել: «Ես ինքս ինձ զրկել եմ այդ կոչումից, և երբևէ որևէ տեղ չեմ ասում, որ նման կոչում ունեմ կամ ունեցել եմ»,- ասել է նա:
ԱՄՆ-ում բնակվող երգչուհի Էռնա Յուզբաշյանը ևս միացել էր նրանց: Երգչուհին ֆեյսբուքյան իր էջում գրել էր. «Կարծում եմ, որ իմ երկրի երջանկությունը կարեւոր է ցանկացած մեդալից»: Նշենք, որ երգչուհի Էռնա Յուզբաշյանը նույնպես իր կոչումը ստացել էր Սերժ Սարգսյանի կողմից՝ 2015 թվականին:
