Չինաստանում առցանց առևտրի ոլորտում աշխատող խոշոր ընկերության՝ Alibaba-ի հիմնադիր Ջեք Ման դարձել է Ասիայի ամենահարուստ մարդը: Այդ մասին գրում է Bloomberg-ը:
Գործակալությունը 55-ամյա չինացու կարողությունը գնահատում է 44,5 միլիարդ դոլար՝ ինչի շնորհիվ նա մոլորակի ամենահարուստ մարդկանց ցուցակում 18-րդն է: 19-րդ տեղում է հնդկական հոլդինգային ընկերության՝ Reliance Industries- ի սեփականատեր Մուկեշ Ամբանին է, ով մինչև նավթի գների անկումն առաջատարն էր Ասիայի հարուստների շարքում: Bloomberg-ը նշում է, որ վերջին օրերի ընթացքում գործարարը կորցրել է մոտ 5,8 միլիարդ դոլար. այժմ նրա կարողությունը կազմում է 41,8 միլիարդ դոլար:
Գործակալության փորձագետների կարծիքով՝ Ման կարողացել է նվազագույնի հասցնել կորուստները: Գործարարի կորուստը կազմել է մոտ 1 միլիարդ դոլար:
Նշենք, որ Alibaba-ն հիմնադրվել է 1999 թվականին և համարվում է աշխարհում խոշորագույն կազմակերպություններից մեկը, որը զբաղվում է առցանց առևտրով և թվային վճարումներով: Ջեք Ման հրաժարվել է իր պաշտոնից կորպորացիայի հիմնադրման 20-ամյակին՝ 2019 թվականի սեպտեմբերի 10-ին:
