Հնդկաստանի Բանգալոր քաղաքում բնակվող մեծահարուստներից մեկը երկնաքերի տանիքին կառուցել է աշխարհի ամենաշքեղ առանձնատներից մեկը, որն իրականում Սպիտակ տան կրկնօրինակն է:
Ինչպես ներկայացնում է Oddity Central-ը, United Breweries Group ընկերության նախագահ Վիջայ Մալիան, որը երկար տարիներ հայտնի է որպես Հնդկաստանի ամենահարուստ մարդկանցից մեկը, Սպիտակ տան կրկնօրինակը կառուցելու մտադրության մասին հայտնել էր դեռևս 2010 թվականին: Մարդիկ թերահավատորեն էին նայում նրա հայտարարությանը՝ մտածելով, որ դա դժվար կլինի անգամ նրա համար:
2016-ին նրա առանձնատունն արդեն կառուցման փուլում էր, սակայն գործարարն այդ ժամանակ ստիպված էր անկատար թողնելով իր երազանքը՝ մեկնել երկրից։
Հեռվից նայելիս թվում է, թե առանձնատունը ավարտուն է, սակայն շինարարական աշխատանքները կիսատ են մնացել: Այն գտնվում է 33 հարկանի աշտարակի տանիքին: «Երկնային առանձնատուն» անվանումն ստացած կառույցը 40 000 քառ մետր տարածք է զբաղեցնում: Այնտեղ, ըստ նախագծի՝ տեղ է հատկացվել գինու մառանի, փակ լողավազանի, բացօթյա անծայրածիր լողավազանի, մարզասրահի, սպա սրահի, ուղղաթիռի վայրէջքի համար նախատեսված հրապարակի համար:
Գործարարը չգիտի՝ երբևէ կվերադառնա Հնդկաստան՝ ապրելու իր «երազանքների տանը», թե ոչ։
