Ռոնալդուն 1 մլն եվրո է նվիրաբերել կորոնավիրուսի դեմ պայքարի համար

Կրիշտիանու Ռոնալդուն միացել է կորոնավիրուսի դեմ պայքարի համար նվիրատվություններ անող մարզիկներին. նա 1 մլն եվրո կհատկացնի:

Ինչպես տեղեկացնում է CNN-ը, պորտուգալացի հարձակվողի նվիրատվության մի մասը կուղարկվի Լիսաբոն, մյուսը մասը՝ Պորտու: Այդ միջոցներով ինտենսիվ թերապիայի երկու բաժանմունք կֆինանսավորվի Լիսաբոնի Սանտա Մարիա հիվանդանոցում, որտեղ ընդունում են կորոնավիրուսով հիվանդներին:

Այս երկու բաժանմունքները կանվանվեն «Ռոնալդու և Մենդես»՝ ֆուտբոլիստի և նրա գործակալի պատվին։

Իսկ Պորտուի Սան Անտոնիո հիվանդանոցը կհամալրվի 15 մահճակալներով, շնչառական սարքավորումներով և համակարգիչներով:

Պորտուգալիայում կորոնավիրուսով վարակվածների թիվը մոտեցել է 3000-ի, 43 մարդ մահացել է:

Հիշեցնենք, որ 1 մլն եվրո նվիրատվություն է կատարել նաև Լիոնել Մեսսին, որի հատկացրած միջոցները հավասարապես կբաշխվեն Արգենտինայի և Բարսելոնայի միջև։