Ամերիկացի միլիարդատերերը համավարակի ֆոնին հարստացել են 434 միլիարդ դոլարով

ԱՄՆ միլիարդատերերը մեծացրել են իրենց հարստությունը՝ չնայած կորոնավիրուսի համավարակին: Այս մասին ասված է Americans for Tax Fairness և Institute for Policy Studies կազմակերպությունների ուսումնասիրությունում, գրում է cnbc.com կայքը:

Այս տարվա մարտի 18-ից մայիսի 19-ն ընկած ժամանակահատվածում «ԱՄՆ-ի 600+ ամենահարուստ մարդկանց» ցուցակում գտնվողները ընդհանուր առմամբ հարստացել են 434 միլիարդ դոլարով: Եվ եթե մարտին ամերիկացի միլիարդատերերը 614-ն էին, ապա այժմ նրանց թիվը աճել է` հասնելով 630-ի:

Համավարակի շրջանում ամենամեծ գումարներն աշխատել են Amazon ընկերության ղեկավար Ջեֆ Բեզոսը (+34,6 միլիարդ դոլար), Facebook-ի հիմնադիր Մարկ Ցուկերբերգը (+25,3 միլիարդ դոլար), Microsoft ընկերության հիմնադիր Բիլ Գեյթսը (+8 միլիարդ դոլար), Oracle ընկերության համահիմնադիր Լարի Էլիսոնը (+7 միլիարդ դոլար), Berkshire Hathaway ընկերության ղեկավար Ուորեն Բաֆեթը (+564 միլիոն դոլար):

Հաշվի առնելով վիճակագրությունը՝ ամենից շատ վաստակել են տեխնոլոգիական ոլորտի սեփականատերերը, քանի որ ամբողջ աշխարհում սահմանված մեկուսացման ռեժիմի պատճառով մի շարք գործընթացներ տեղափոխվել են առցանց հարթակ:

Վերլուծաբանները կարծում են, որ Amazon ընկերության հիմնադիր Ջեֆ Բեզոսը կդառնա աշխարհում առաջին դոլարային տրիլիոնատերը:

Միևնույն ժամանակ, միլիարդատեր, Louis Vuitton Moët Hennessy ընկերության ղեկավար Բեռնար Առնոն համավարակի ֆոնին զրկվել է 30 միլիարդ դոլարից: