«Союзмультфильм» կինոստուդիայի տնօրեն Բորիս Մաշկովցևը հայտնել է, որ «Դե սպասիր» («Ну, погоди!») մուլտֆիլմի նոր սերիաներում գայլը չի ծխելու, դրա փոխարեն նախատեսվում է այլ խորհրդանշաններով կերտել հերոսի կերպարը, հայտնում է «ՌԻԱ Նովոստի» գործակալությունը։
Ավելի վաղ կինոստուդիան մուլտսերիալի շարունակության 3 նոր հերոսների կերպարներ էր ներկայացրել, որոնք կլինեն փորսուղ Տիմը, ոզնի Շուն և եղջերու Ուլյան։ Ընդհանուր նախատեսվում է մուլտֆիլմի առնվազն 52 սերիա թողարկել, որոնք կստեղծվեն 3D ձևաչափով։
«Այն սերիաներում, որոնց համար այժմ սցենարներ են մտածում, գայլն ընդհանրապես չի ծխում»,- նշել է Մաշկովցևը՝ ընդգծելով, որ հարցը նրա կերպարի ծխելու մեջ չէ, այլ նրա, թե հերոսի մասին ինչ տեղեկություն է անհրաժեշտ փոխանցել հեռուստադիտողին։
Նրա կարծիքով՝ մեր օրերում հեռուստադիտողը գայլի ծխելը լիովին այլ կերպ է ընկալելու։
«Եթե գայլը ծխի, ապա տեղեկությունը կաղավաղվի։ Ժամանակակից հեռուստադիտողին գայլի նույն կերպարը հասցնելու համար լիովին այլ խորհրդանշաններ պետք է օգտագործենք»,- մանրամասնել է նա։
Մաշկովցևը նշել է նաև, որ մուլտֆիլմի ընդհանուր կառուցվածքը պահպանվում է, սակայն որոշակի փոփոխություններ լինելու են, քանի որ մուլտֆիլմի ստեղծմամբ այժմ այլ մարդիկ են զբաղվում։
Հայտնի է, որ ստուդիան դեռևս հերոսների հնչյունավորման համար դերասաններ չի ընտրել և դեռ քասթինգի փուլում է գտնվում։
Ինչպես ավելի վաղ հայտնի էր դարձել, մուլտֆիլմի առաջին սերիաները կհայտնվեն այս տարի, առաջին սեզոնի շրջանակում կթողարկվի յոթ րոպե տևողությամբ 26 դրվագ։