Variety հրատարակության հետ նոր հարցազրույցում դերասան Հենրի Քավիլը մեկնաբանել է Սուպերմենի դերին վերադառնալու մասին շշուկները:
Քավիլի խոսքով՝ այդ լուրերն «ավելի անհեթեթ են դառնում», ինչը երբեմն վշտացնում է իրեն:
«Նման բան չկա՝ ոչ մի որոշում, ոչ մի բանակցություն: Բայց կարևոր է, որ մարդկանց դա հետաքրքիր է, նրանք սիրում են Սուպերմենին»,- նշել է նա՝ ուրախանալով, որ երկրպագուները Սուպերմենին կրկին ուզում են տեսնել էկրաններին:
«Իսկ ես, իհարկե, հաճույքով նորից կխաղայի այդ դերը»,- ասել է նա:
Այն մասին, որ «Warner Bros» ընկերությունը բանակցություններ է վարում Հենրի Քավիլի հետ Քլարկ Կենտի դերի համար, հայտնի է դարձել մայիսի վերջին: Հաղորդվում է, որ նրա մասնակցությունը դիտարկում են «Շազամ-2», «Ակվամեն-2» և «Սև Ադամ» ֆիլմերի համար: Այդ մասին գրում է «NEWS.ru»:
