Էստոնիայի պետական տեղեկատվական համակարգի բաժանմունքն իր աշխատակիցներին արգելել է ծառայողական հեռախոսներով TikTok հավելվածից օգտվել, քանի որ համարում է, որ այն երկրի անվտանգության դեմ սպառնալիք կարող է լինել, գրում է «ՌԻԱ Նովոստի» գործակալությունը։
«Այս որոշումը հիմնավորվում է հունիսին ստացված և այլ աղբյուրների միջոցով ավելի ուշ հաստատված տեղեկություններով այն մասին, որ TikTok-ն օգտատերերի մասին չափից շատ տվյալներ է հավաքում։ Բացի այդ՝ այդ հավելվածը հենց հեռախոսի մասին տեղեկություն է ստանում, ինչը թույլ է տալիս անընդհատ հետևել դրա տեղաշարժին և, իհարկե, դրանում պահպանվող տվյալներին»,- նշել է բաժանմունքի պետ Թինու Թամմերը։
Նշվում է, որ տեղեկատվական համակարգերի բաժանմունքն իր որոշման մասին պետական այլ հիմնարակություններին նույնպես տեղյակ է պահել։
Երկրի ՆԳՆ կից տեղեկատվական տեխնոլոգիաների կենտրոնի Տեղեկատվական անվտանգության ծառայության ղեկավար Ուկո Վալթենբերգը նշել է, որ նախարարությունը դեռևս TikTok-ի օգտագործումը չի արգելել․
«Դեռևս նման արգելք չենք սահմանել, սակայն աշխատանքային խումբ ունենք, որը գնահատում է այդ առաջարկը։ Ներքին գործերի նախարարության համակարգում տեղեկություններ կան բոլոր ծառայողական հեռախոսների մասին, որոնցում TikTok-ը ներբեռնվել է։ Դեպքեր են լինում, որ ոստիկանությանն, օրինակ՝ գործի քննության համար օգտատիրոջ TikTok-ն է անհրաժեշտ է լինում»,- պարզաբանել է Վալթենբերգը։
