Մազերի, մաշկի ու եղունգների առողջությունը շատ կարևոր նշանակություն ունի գեղեցկության պահպանման հարցում, սակայն շատ հաճախ անգամ լավագույն կոսմետիկ միջոցները չեն օգնում խուսափել մաշկային խնդիրներից ու մազերի և եղունգների վիճակի վատթարացումից, քանի որ շատ դեպքերում խնդիրը զուտ կոսմետիկ բնույթ չի կրում։
Աչքերի տակ պարկերի ու մուգ շրջանակների, ինչպես նաև մազաթափության և մազերի ու եղունգների փխրունության խնդիրը հատկապես արդիական է լինում աշնանն ու ձմռանը, ինչը պայմանավորված է եղանակի ու սննդակարգի փոփոխություններով։ Նման դեպքերում շատերը փորձում են լուծել խնդիրը հատուկ խնամքի միջոցներով, մինչդեռ իրականում պայքարի լավագույն միջոցը ճիշտ սննդակարգն է, որն շատ կարևոր է ոչ միայն իմունային համակարգի ամրապնդման, այլև գեղեցկության պահպանման համար։
Գերմանական Freundin պարբերականը ներկայացրել է սննդամթերքի այն տեսակները, որոնք սննդակարգում ներառելը թույլ կտա պահպանել գեղեցկությունն ու կազատի մաշկի, մազերի ու եղունգների հետ կապված մի շարք խնդիրներից։
Նշի մածուկ
Նշի մածուկը պարունակում է մեծ քանակությամբ սննդարար նյութեր, այդ թվում՝ սպիտակուցներ, վիտամիններ ու օգտակար ճարպաթթուներ, որոնք խթանում են մազերի աճը։ Սա նաև վիտամին Е-ի հարուստ աղբյուր է, իսկ այս տարրը մազաթափության դեմ պայքարող և մազերի աճը խթանող ամենահզոր միջոցներից մեկն է։ Հետազոտությունները ցույց են տվել, որ ամեն օր վիտամին Е-ի հավելումներ ընդունելու դեպքում տղամարդիկ կարող են ութ ամսում 42 տոկոսով ավելացնել մազերի ծավալը։
Կիտրոն
Տարվա այս եղանակին մարդիկ հաճախ են բախվում եղանակի տատանումների ու քնի խանգարումների խնդրին, ինչն էլ բացասաբար է անդրադառնում մաշկի վիճակի վրա` արտաքինին հաղորդելով հոգնած ու ոչ թարմ տեսք։ Նման դեպքերում խնդիրը կարելի է լուծել կիտրոնով ջրի օգնությամբ, որը կհագեցնի օրգանիզմը վիտամին C-ով` մաշկային բորբոքումների ու մաշկի անառողջ գույնի դեմ պայքարող լավագույն հակաօքսիդանտներից մեկով։
Անյուղ տավարի միս
Այս մթերքը պարունակում է մեծ քանակությամբ սպիտակուցներ, երկաթ ու ցինկ` տարրեր, որոնք պահպանում են մազերի ու եղունգների առողջությունը, ամրապնդում են դրանք ու խթանում աճը։ Ընդ որում` ցանկալի արդյունքին հասնելու համար բավական կլինի շաբաթական 1-3 բաժին միս ուտելը, սակայն այն հարկավոր է ուտել կանոնավոր։
