Դերասանուհի-հաղորդավարուհի Նազենի Հովհաննիսյանը ֆեյսբուքյան իր էջում գրել է, որ թշնամու՝ Սուրբ Ամենափրկիչ Ղազանչեցոց եկեղեցուն մտածված հարվածը դուրս է բոլոր գրված ու չգրված օրենքներից:
«Էս գիշեր մամաս էր եկել երազիս. ինձ խաչակնքել էր սովորեցնում: Անընդհատ խաչ էր անում, ասում էր, որ չարը չվնասի: Ինքը միշտ զգուշացնում է, ինչ-որ բան է ուզում ասել, պաշտպանել: Քիչ անց կարդացի այս լուրը: Աստված մեզ զորավիգ լինի, մայրերն էլ` երկրում, թե երկնքում՝ մեզ պաշտպան:Հայը երբեք չի վնասել որեւէ մզկիթ, չնայած՝ դրանք տեղակայված են եղել թշնամու բոլոր ռազմական օբյեկտներին կից, ո՛չ Ակնայում, ո՛չ Շուշիում:
90-ականներին թուրքն իր զենքն էր պահում այստեղ՝ վստահ լինելով, որ հայը երբեք չի հարվածի Աստծո տանը: Շուշին շատ բան է տեսել, բայց հային չես ընկճի, չես կոտրի ու հաստատ չես ոչնչացնի:
Վայրագ թշնամիներով ենք շրջապատված, կույր աշխարհով ու անաստված մարդկանցով: 21-րդ դարում համատարած վայրագություն է իրականացվում, իսկ հետո կխոսեն «մարդու իրավունքներից»:
Մենք էլ ենք մարդ, իրե՞նք էլ:
Բայց մենք էնքան ուժ ունենք, որ մեր` 19-րդ դարի Սուրբ Ամենափրկիչ Ղազանչեչոցը կվերականգնենք, ինչպես մենք դա արել ենք 1994-ի հաղթական պատերազմից հետո։ Մեր ներսի եկեղեցին էլ պիտի վերկանգնենք, մեր միասնությունն էլ, մեր երկիրն էլ:
Քրիստոսի աջով ու խաչով: Հաղթելու ենք:
հ.գ. Ես ամեն վայրկյան եմ ապրել տեսել ու վայելել իմ խաղաղ, ծաղկող երկիրը ու աշխարհը ճաք տա` էլի եմ տեսնելու»,-գրել է Նազենին:
