Իսպանական El confidencial digital կայքը իսպանահայ դերասան Հովիկ Կեուչկերյանի հետ հարցաղրույց է արել Արցախի պատերազմի մասին։
Հովիկն Արցախում տեղի ունեցող դեպքերը բնութագրել է րպես ցեղասպանություն և դիմել միջազգային հանրությանը` օգնության խնդրանքով: Հովիկի համար Լեռնային Ղարաբաղի և Ադրբեջանի միջև տեղի ունեցածը ոչ թե կոնֆլիկտ է, այլ ագրեսիա և ներխուժում հայկական հողեր:
Հովիկը կայքին ասել է, որ կա երկու հրեշ` Թուրքիան և Ադրբեջանը. «Հակառակորդն ունի նավթ, Հայաստանից ավելի ուժեղ է և տարածում է կեղծ ինֆորմացիա: Այս ամենի դեմ պայքարելն ասես նման լինի «Ռեալ մադրիդ»-ի և դպրոցականների միջև ֆուտբոլային հանդիպմանը: Այս ամենի դեմ հնարավոր չէ պայքարել, անհրաժեշտ է միջազգային հանրության օգնությունը»:
Հովիկը նաև անդրադարձել է 1915 թվականի հայերի Ցեղասպանությանը: Նա ասել է, որ երբ պատիժ չի լինում, իրադարձությունները կարող են կրկնվել. «Թուրքիան մինչև հիմա չի ընդունում, որ հայերի դեմ Ցեղասպանություն է իրագործել: Հիմա` այս համաճարակի ժամանակաշրջանում, ոչ ոք ժամանակ չունի հայերի մասին խոսելու և հիշելու համար»:
Դերասանն ընդգծել է, որ Հայաստանի և Արցախի բնակչությունը 3 150 000 է, Թուրքիայինն ու Ադրբեջանինը` 92 մլն. «Թուրքիան ու Ադրբեջանն ունեն Հայաստանի բանակից 25 անգամ ավելի հզոր և տեխնիկապես զարգացած բանակ: Արցախի դեմ են կռվում վարձկան ահաբեկիչները: 3 մլն հայեր ուղղակի ցանկանում են խաղաղ ապրել իրենց հայրենքիում, բոլոր հայերի սուրբ հայրենիքում, բայց երևում է` մենք դրա իրավունքն էլ չունենք: Մինչև այսօր էլ Էրդողանի Թուրքիան չի ընդունել Հայոց Ցեղասպանությունը և շարունակում է զբաղեցնել ի սկզբանե հայկական տարածքների 80 տոկոսը, այդ թվում` Արարատ լեռը, որը մեր սրբազան լեռն է և միշտ էլ մերը կմնա»։
Դերասանը խոստովանել է, որ երկու շաբաթ է` դժվար կացության մեջ է. այն բանից հետո, երբ տեսանյութ է հրապարակել, որում բարձրաձայնում է հայրենակիցների հետ տեղի ունեցողի մասին, հասկանում է, որ մեծ վտանգի է ենթարկում իրեն, ստիպված անվտանգության աշխատակիցների հետ շրջել։