«Հայ ասպետ» հիմնադրամի հիմնադիր-տնօրեն Կարին Տոնոյանը ֆեյսբուքյան իր էջում գրառում է կատարել` ասելով, որ «Հայ ասպետ» հեռուստախաղի դադարեցումից հետո ԿԳՄՍ նախարարությունը հայտարարել էր, թե այսուհետ ծրագրերը մրցույթով են որոշվելու և, կառավարություն դիմելուց հետո, պաշտոնական պատասխան են ստացել, որում նշված է, որ կառավարությունը դեռ պետք է ճշտի՝ նպատակահարմար գտնո՞ւմ է մանկական ինտելեկտուալ հեռուստախաղ ֆինանսավորել, թե՞ ոչ: Իսկ ահա «Մել» ֆիլմի և «ՀուԶանք ու Զանգ» ներկայացման ցուցադրությունը նպատակահարմար է համարում:
«Չէ, Դուք մեղավոր չեք, մենք ենք մեղավոր, որ հանդուրժում ենք այս ծաղրը: Բաց նամակի տրամադրություն չունեմ՝ անիմաստ եմ համարում, բայց տեղեկացնեմ, որ մեկ տարի առաջ, երբ դադարեցվեց տարեկան 1100 աշակերտ և 300 զինվոր մասնակից ունեցող «Հայ ասպետ» հեռուստախաղը, պատրվակվեց, որ այսուհետ մրցույթով է լինելու, նախարարը մի քանի անգամ, անգամ ԱԺ-ում խոստացավ, թե շուտով մրցույթ կլինի…
Վերջին անգամ, մեկ ամիս առաջ, երբ հանդգնեցինք հարցնել՝ բա մրցույթն ի՞նչ եղավ, պաշտոնական պատասխան ստացանք, թե կառավարությունը դեռ պետք է ճշտի՝ նպատակահարմար գտնո՞ւմ է մանկական ինտելեկտուալ հեռուստախաղ ֆինանսավորել, թե՞ ոչ: Հա, հա, հա… Հռհռոցն անգամ չի սազի ձեր ցինիզմին:
Բա ձեր այդ «Մել» ֆիլմը, կամ երեկվա այդ խեղկատակություն-ներկայացում կոչվածի ֆինանսավորումը կառավարության ո՞ր նիստում էր նպատակահարմար համարվել, պարոնայք, և ո՞րն է դրանց նպատակը, կամ մրցույթ անցկացրեցի՞ք դրանց ֆինանսավորման համար: Դե պատասխանեք, թե՞ նպատակահարմար չեք գտնում պատասխանել»,- գրել է «Հայ ասպետ»-ի հեղինակ վարողը:
