Ամերիկացի գրող Ջորջ Մարտինը իր բլոգում գրառում է տեղադրել, որում ասվում է, որ կորոնավիրուսի հետ կապված ինքնամեկուսացման պատճառով ինքն աշխատում է «Ձմռան քամիներ» վեպի վրա («Սառույցի և կրակի երգ» շարքի վեցերորդ գիրքը) ավելի շատ, քան երբևէ, հայտնում է Daily Mail- ը:
«Հիմա ես ավելի շատ ժամանակ եմ ծախսում Ուեստերոսում (հորինված մայրցամաք), քան՝ իրականում: Ես գրում եմ ամեն օր: Յոթ թագավորություններում ամեն ինչ շատ մռայլ է: Բայց, այնուամենայնիվ, ամեն ինչ այնքան վատ չէ, որքան մեզ մոտ: Չեմ կարող ազատվել այն զգացողությունից, որ մենք ապրում ենք գիտաֆանտաստիկ վեպում», – գրել է Ջորջ Մարտինը:
Գրողը պատմել է, որ կորոնավիրուսի բռնկման պատճառով նա ստիպված է եղել փակել իր մի շարք հաստատությունները, այդ թվում՝ ոչ առևտրային Stageciach հիմնադրամը և Jean Cocteau կինոթատրոնը (գտնվում է ԱՄՆ-ի Նյու Մեքսիկո նահանգի Սանտա Ֆե քաղաքում): Մինչ այժմ բաց է միայն նրա գրախանութը՝ Beastly Books-ը:
«Հաշվի առնելով իմ տարիքը (գրողը 71 տարեկան է) և իմ ֆիզիկական վիճակը՝ ես գտնվում եմ ամենախոցելի խմբում: Բայց հիմա ինձ լավ եմ զգում: Մենք ձեռնարկում ենք բոլոր նախազգուշական միջոցները: Ես գտնվում եմ առանձնացված վայրում և ինձ մոտ մեկ օգնական կա: Ես չեմ գնում քաղաք և ոչ ոքի չեմ հանդիպում»,- ասել է Ջորջ Մարտինը:
