«Սարսափների ամերիկյան պատմություն» սերիալի համահեղինակ Ռայան Մերֆին իր ինսթագրամյան էջում անոնսել է 10-րդ եթերաշրջանի դերասանական կազմը: Նա հրապարակել է հոլովակ, որում օվկիանոսի ֆոնին հայտնվում են դերասանների անուններ: Տեսանյութը մակագրված է այսպես՝ «#AHSSeason10»:
ТАСС-ի հաղորդմամբ՝ ցանկում առաջին անուններից մեկը պատկանում է Մակոլեյ Կալկինին: Վերջինս ավելի հայտնի է «Տանը մենակ» ֆիլմաշարով: Նա առաջին անգամ է խաղալու «Սարսափների ամերիկյան պատմություն»-ում: Դերասանական կազմի մյուս մասնակիցներն են Քեթի Բեյթսը, Լեսլի Գրոսմանը, Բիլլի Լուրդը, Սառա Փոլսոնը, Էվան Փիթերսը, Ադինա Փորթերը, Լիլի Ռեյբը, Անժելիկա Րոսսը և Ֆինն Ուիթրոքը, որոնք արդեն հայտնվել են սերիալում:
Ինչպես նկատում է Variety պարբերականը, շնորհիվ «Սարսափների ամերիկյան պատմության»՝ Կալկինն առաջին անգամ գեղարվեստական սերիալ հիմնական դերասանական կազմի մասնակից կդառնա:
Ավելի վաղ հայտնի էր դարձել, որ սերիալը երկարացվել է և ունենալու է 13 եթերաշրջան:
