Հոլիվուդյան դերասանուհի Քեյթ Ուինսլեթը նոր կենսագրական ֆիլմում կմարմնավորի ամերիկյան նորաձևության լուսանկարիչ, Vogue-ի շապիկի ֆոտոմոդել, ռազմական թղթակից Լի Միլլերին, գրում է Daily Mail-ը։
Հաղորդվում է, որ Քեյթ Ուինսլեթը հայտարարվել է «Լի» վերնագրով ֆիլմի գլխավոր դերակատար և կմարմնավորի Լի Միլլերին, որը Երկրորդ համաշխարհային պատերազմի տարիներին դարձել է ռազմական թղթակից, մեկնել առաջնագիծ՝ փորձելով բացահայտել նացիստների մասին ամենասարսափելի ճշմարտությունները։
Ֆիլմի ռեժիսորը կլինի Էլեն Կուրասը՝ «Մաքուր բանականության հավերժ փայլատակում» (Eternal Sunshine of the Spotless Mind) հայտնի ռոմանտիկ դրամայի ռեժիսորը, որում գլխավոր դերերով հանդես են եկել Քեյթ Ուինսլեթն ու կատակերգու և դերասան Ջիմ Քերին։
Ֆիլմը, որը կարող է էկրաններին հայտնվել արդեն հաջորդ տարի, հիմնված կլինի «Լի Միլլերի կյանքերը» գրքի վրա, որի հեղինակը Միլլերի որդին՝ Էնթոնի Փենրոզն է։
«Ես չափազանց հիանում եմ նրանով, և խանդավառությամբ եմ համակվել նրան այս ֆիլմում մարմնավորելու համար»,- ասել է օսկարակիր դերասանուհի Քեյթ Ուինսլեթը։
Երկրորդ համաշխարհային պատերազմի ժամանակ Միլլերը եղել է ֆոտոլրագրող, աշխատել է «Vogue» ամսագրի համար: Նա հավատարմագրվել է որպես ռազմական թղթակից, նկարահանել դաշնակիցների վայրէջքը, Փարիզի ազատագրումը, Բուխենվալդի և Դախաուի ճամբարները։
Պատերազմից հետո հետտրավմատիկ սթրեսային խանգարման ուժեղ նոպաներ է ունեցել, սկսել է խմել:
