Բրիտանական The Sun պարբերականը հոդված է հրապարակել ամերիկյան Keeping Up With the Kardashians իրապատում շոուի ամերիկահայ աստղ Քիմ Քարդաշյանի նմանակի մասին, որն այնքան նման է իրապատում շոուի աստղին, որ վերջինիս անունից սկսել է ինքնագրեր բաժանել։
Լոս Անջելեսի բնակչուհի Ջենիֆեր Ուորդը խոստովանել է, որ սիրահարվել է Քիմ Քարդաշյանի կերպարին, և քանի որ ծանոթները բազմիցս պնդել են, որ նա արտաքին նմանություն ունի աստղի հետ, որոշել է նմանակել նրան։
Աղջկա խոսքով՝ իր և Քարդաշյանի մյուս նմանակների տարբերությունն այն է, որ ինքը կոսմետիկ վիրահատություններ չի արել։ Ուորդի պնդմամբ՝ հիմնական բարդությունը Քիմի զգեստապահարանին համապատասխան զգեստներ գտնելն է։
«Քիմին նմանվելու համար ես հսկայական կարողություն եմ ծախսում հագուստի, աքսեսուարների, կոսմետիկայի և ֆիթնեսի վրա։ Նրա ոճը շատ արագ փոխվում է, այդ պատճառով ես ամեն օր հետևում եմ Քիմի Instagram-ին»,- Ջենիֆերի խոսքը մեջբերում է պարբերականը։
Ուորդի խոսքով՝ իրապատում շոուի աստղին կրկնօրինակելը հաջողված է համարում, քանի որ փողոցում նրան հաճախ են սկսել շփոթել Քարդաշյանի հետ, նույնիսկ խնդրում են ինքնագիր տալ, «սելֆի անել» և նրան դիմում են Քիմ անունով։
«Ես մարդկանց բացատրում եմ, որ Քարդաշյանը հայ է, իսկ իմ արմատներն Իտալիայից և Բրիտանիայից են, մենք նույնիսկ ազգակիցներ չենք, բայց մարդիկ ինձ չեն հավատում»,-պատմում է Ջենիֆեր Ուորդը:
Քիմ Քարդաշյանին նմանվելու համար աղջկան օրական ավելի քան 6 ժամ է հարկավոր՝ 4 ժամ դիմահարդարման, վարսահարդարման և զգեստների ընտրության համար, ևս 2 ժամ՝ ֆիթնեսում մարզվելու համար։ Աղջկա խոսքով՝ ամուսինը դեմ չէ իր մոլուցքին։