«Միսս Տիեզերք 2019» մրցույթի մասնակից մի քանի երկրների գեղեցկուհիներ հանդես են եկել Հայաստանի սահմանին ադրբեջանական հարձակումների դեմ կոչերով և այս ամենը «Միսս Տիեզերք Արմենիա 2019» Դայանա Դավթյանի նախաձեռնության շնորհիվ:
Իրենց սոցիալական կայքերի էջերում «Աջակցում եմ Հայաստանին»/Support Armenia հեշթեգներով լուսանկարներ են տեղադրել Սալվադորի, Նիգերիայի, Բուլղարիայի, Գուամի, Արգենտինայի, Տանզանիայի, Շվեդիայի և Հոնդուրասի ներկայացուցիչները:
Showbiz.am կայքի հետ զրույցում Դայանան պատմեց, թե ինչպես իր մոտ առաջացավ այդ մտահաղացումը և անդրադարձավ այն գեղեցկուհուն, ով հրաժարվեց աջակցել Հայաստանին:
«Տեսնելով այս դժվար իրավիճակը Հայաստանի սահանին՝ ես մտածում էի, թե ինչ կարող եմ անել, ու մտքովս մի բան անցավ. որոշեցի նախաձեռնություն սկսել` կոչ անելով «Միսս տիեզերք» մրցույթի մասնակից աղջիկներին սատարել ու աջակցել Հայաստանին»,- պատմում է Դայանան ու հավելում,- «Քանի որ սա քաղաքական հարց է, ես կարծում էի, որ արձագանքներ չեն լինի, որովհետև գեղեցկության մրցույթի մասնակիցներն իրավունք չունեն քաղաքական հարցերի անդրադառնալ: Բայց աղջիկներն արձագանքեցին, քանի որ այսպիսով նրանք աջակցում են ոչ միայն քաղաքական առումով, այլ նաև Ադրբեջանին կոչ են անում դադարեցնել ագրեսիան: Իրենց երկրում նրանք բավականին հայտնի են, ու կարծում եմ, որ սա մեծ աջակցություն է, որովհետև նրանք տեղադրելով «Աջակցում եմ Հայաստանին» հեշթեգով լուսանկարները` կոչ են անում իրենց հետևորդներին աջակցել Հայաստանին: Չէ՞ որ շատ մարդիկ կան աշխարհում, ովքեր անգամ չգիտեն, որ Հայաստան անվամբ երկիր կա ու տեղյակ չեն մեր խնդիրներին։ Աղջիների շնորհիվ շատերն իմացան, հետաքրքրվեցին ու բռնեցին Հայաստանի կողմը: Ինչպես նաև նրանց աջակցության այդ խոսքերը «դուխ» տվեցին հայ ժողովրդին ու զինվորներին, ովքեր տեսան, որ այդ մարդիկ Հայաստանի կողմից են ու աջակցում են մեզ»:
Դայանան նաև նշում է, որ չնայած «Միսս տիեզերք» մրցույթից անցել է մեկ տարի, բայց մրցույթի մասնակցների հետ նա լավ հարաբերություններ ունի և չի կորցրել կապը, դրա շնորհիվ էլ իր մտահաղացումը գեղեցկուհիները շատ լավ ընդունեցին ու համաձայնվեցին:
«Մենք պարբերաբար խոսում են սոց․ կայքերով: Ես նրանց գրեցի, նկարագրեցի իրավիճակը, թե ինչ է կատարվում Հայաստանում հիմա և որ մենք ունենք աջակցության կարիք: Առաջարկեցի նման ֆլեշմոբ սկսել: Դեռ բոլորը չեն ուղարկել, ընթացքի մեջ է»,- ասում է նա:
Դայանան նաև պատմում է այն միակ աղջկա մասին, ով հրաժարվեց աջակցել Հայաստանին:
«Մի աղջիկ, որն ի միջի այլոց ինձ հետ նույն սենյակում էր մնում, ասաց. «Կներես, ես չեմ կարող, քանի որ ինձ իմ տնօրենը թույլ չի տալիս որևէ քաղաքական թեմայի շուրջ գրառում անել սոցիալական կայքերում»:
Նա նաև ասաց, որ ունի և՛ հայ, և՛ ադրբեջանցի ընկերներ ու այդ պատճառով չի ցանկանում որևէ մեկի կողմը բռնել: Բայց միայն նա էր, որ նման նամակ ինձ գրեց: Կարծում եմ՝ կլինեն աղջիկներ, ովքեր չեն մասնակցի այս ֆլեշմոբին. ես հասկանում են նրանց դիրքորոշումը: Իրոք լուրջ քայլ է երկու հակամարտող երկներից մեկի կողմը բռնել»,- նշում է Դայանան:
Գեղեցկուհին իր խոսքը եզրափակում է` ասելով, որ անգամ չէր կարող պատկերացնել, որ նման մեծ արձագանք կունենա իր նախաձեռնությունը:
Նշենք, որ «Աջակցում եմ Հայաստանին» ֆլեշմոբին մասնակցել են Ռոզմարի Առաուզը ( Հոնդուրաս), Լինա Լջունգբերգը ( Շվեդիա), Մարիանա Ջեսսիկա Վարելան (Արգենտինա), Սիսսի Լուոն (Գուամ), Լոռա Ասենովան (Բուլղարիա), Օլուտոսին Իտոհան Արարամին (Նիգերիա), Զուլեյկա Սոլերը (Էլ Սալվադոր), Շուբիլա Սթենթոնը (Տանզանիա):
Հեղինակ` Տաթևեր Լազարյան