ԱՄՆ նախկին առաջին տիկին Միշել Օբաման Spotify հարթակում փոդքասթ է վարում: Հատկանշական է, որ փոդքասթի առաջին դրվագի հյուրը եղել է ամուսինը՝ ԱՄՆ պատմության մեջ առաջին աֆրոամերիկացի նախագահ Բարաք Օբաման:
Ինչպես նշում է Daily Mail-ը, ամուսինները քննարկել են տարբեր թեմաներ, վերհիշել մանկությունը, երիտասարդ տարիներն, իրենց առաջին հանդիպումը:
«Դու ամեն ինչի կարող էիր հասնել քո ակադեմիական նվաճումների շնորհիվ, դու համար մեկ ուսանողն էիր Harvard Law Review-ում և դրա առաջին աֆրոամերիկացի նախագահը»,- տրվելով հուշերին՝ ասել է Միշել Օբաման, ինչին ի պատասխան ամուսինը նկատել է.«Ահա, թե ինչու սկսեցիր հետս հանդիպել: Կարծում էիր՝ ես քո կանաչ լույսն եմ, չէիր պատկերացնում, որ դուրս կգամ ու այլ ուղղությամբ կգնամ»:
«Այնպիսի տպավորություն էր, որ դու փախչում ես փողից, և ես մտածում էի՝ այս աֆրոամերիկացու հետ մի բան այն չէ»,- ծիծաղելով շարունակել է Միշել Օբաման:
Զրույցի վերջում նախկին նախագահը կնոջը շնորհակալություն է հայտնել իրեն հրավիրելու համար:
Միշել Օբամայի հետագա հյուրերի ցանկի մասին տեղեկություն չկա: