Ամերիկյան հանրահայտ «Կեղտոտ պարեր» մելոդրաման, որը 1980-ական թվականների կինոհիթերից էր, 33 տարի անց սիքվել կունենա:
Ինչպես նշում է Daily Mail-ը, գլխավոր հերոսուհուն՝ Բեյբի Հաուսմանին, մարմնավորած Ջենիֆեր Գրեյը հանդես կգա և՛ որպես գլխավոր դերակատար, և՛ որպես պրոդյուսեր:
Տեղեկությունը հաստատել են նաև Lionsgate Films կինոստուդիայից: Ինչ վերաբերում է ֆիլմի մյուս գլխավոր դերակատարին՝ Պատրիկ Սուեյզիին, ապա նա մահացել է 2009 թ.:
«Դա լինելու է ռոմանտիկ, նոստալգիկ ֆիլմ, որին «Կեղտոտ պարեր»-ի երկրպագուները սպասում էին»,- նշել են Lionsgate Films-ից:
«Կեղտոտ պարեր»-ը, ունենալով ընդամենը 5 մլն դոլար բյուջե, համաշխարհային կինովարձույթում հավաքել է մոտ 220 մլն, իսկ Գրեյի և Սուեյզիի անզուգական խաղի շնորհիվ այն դարձել է փոփ մշակույթի գագաթնակետից մեկը:
