Ամերիկյան Netflix ընկերության «Գահը» սերիալի առաջիկա սերիաներում կցուցադրվի Ուելսի արքայադուստր Դիանայի պայքարը բուլիմիայի դեմ՝ սննդային վարքի խանգարում, որը բնորոշվում է շատակերությամբ և դրան հաջորդող «մաքրումով», գրում է Daily Mail-ը։
Ինչպես նշում է աղբյուրը, հաշվի առնելով այն հանգամանքը, որ արքայազն Հարին բոլորովին վերջերս պայմանագիր է կնքել Netflix-ի հետ, «Գահը» սերիալի չորրորդ եթերաշրջանում արքայադուստր Դիանայի՝ բուլիմիայի դեմ պայքարի պատկերումը կարող է հանգեցնել վերջինիս և արքայազն Ուիլյամի միջև բախմանը։
«Ուիլյամը և թագավորական ընտանիքի մյուս անդամները վրդովված են այս դրամայի պատճառով, ինչպես նաև զայրացած են Հարիի վրա, քանզի վերջինս այժմ համագործակցում է այդ հեռարձակող ընկերության հետ»,- ասել է The Sun թերթի աղբյուրը։
Արքայադուստր Դիանայի մոտ սննդային վարքի խանգարումն ի հայտ է եկել ամուսնալուծությունից հետո․ ֆիլմում նրա դերում հանդես կգա 24-ամյա դերասանուհի Էմմա Կորինը։
Ավելի վաղ հայտնի էր դարձել, որ արքայազն Հարին և նրա կինը՝ Մեգան Մարքլը, ֆիլմերի և սերիալների արտադրությամբ զբաղվող Netflix ընկերության հետ բազմամիլիոնանոց պայմանագիր են կնքել։
