Երգչուհի Իվետա Մուկուչյանը օրեր առաջ մեկնել է Արցախ, շրջել այնտեղ, զրուցել բնակիչների հետ և փոքր ռեպորտաժ նկարահանել:
Ռեպորտաժը, որը գերմաներեն է, Մուկուչյանը տեղադրել է Ֆեյսբուքի իր էջում և գրել, որ պետք է իր ձայնն օգտագործի աշխարհին իր ազգի մասին պատմելու համար:
«Իմ առաքելությունը պատմելն է մեր ազգի մասին, որն այս օրերին մոռացված է աշխարհի կողմից: Վերջին անգամ այցելեցի այն վայրերը, որոնք միշտ իմ հայրենիքի մի մասն էին: Օրեր անց մենք ստիպված ենք այն հանձնել թշնամուն՝ որպես պատերազմի դառը գին: Իմ սիրելի Արցախ… Դժվար է խոսել քո տարածքային ամբողջականության մասին անցյալ ժամանակով:
Հասկանալով, որ աշխարհը լուռ է, ես որոշեցի ներկայացնել եղածն այս ռեպորտաժի միջոցով: Սա իմ առաջին վավերագրական աշխատանքն է, ներողություն եմ խնդրում, որ այն իդեալական չէ»,- նշել է երգչուհին:
Ավելի վաղ Մուկուչյանը տեսանյութ էր հրապարակել, որում ինքը կատարում էր «Սիրտ իմ սասանի» հոգևոր ստեղծագործությունը Դադիվանք վանական համալիրում: