ՀՀ վաստակավոր արտիստ, Գաբրիել Սունդուկյանի անվան ազգային ակադեմիական թատրոնի դերասանուհի Նելլի Խերանյանը Ֆեյսբուքի իր էջում գրառում է արել՝ անդրադառնալով նախկին-ներկա բաժանումներին, մարդկանց փոխհարաբերություններին:
«Տիգրանը ճիշտ էր, ես սխալվեցի։ Ինձ թվում էր՝ նախկին-ներկա ջրբաժանը կավարտվի հայրենիքի գլխին կախված վտանգի սարսափելի իրողությունից։ Պարզվեց՝ ոչ, խրախճանքը շարունակվում է։ Շարունակում ենք մեր կյանքն իմաստավորել նախկիններով ու ներկաներով, շարունակում ենք ատելության ու վախի արդյունքում կուտակված ադրենալինը խժռել անհագ ծարավով։ Շարունակում ենք իրար միս ուտել նախկին ու ներկա իշխանավորի համար, աստվածացնել նրանց, սարսափել նրանցից, դեգերել անցյալի ու ներկայի արանքում՝ մոռանալով ապագայի լույսի, մարդակային պարզ՝ շատ պարզ, հասարակ փոխհարաբերությունների մասին։ Իրար լսելու, հասկանալու, վերլուծելու, քննարկելու, կասկածելու, կուրորեն չհավատալու, մտածելու, մտածելու, մտածելու մասին մոռացել ենք իսպառ գուցե անկարողության պատճառով։ Ախ էդ լափամանը, որ խոթել են ձեր ուղեղի մեջ՝ այն պարզապես լափաման դարձնելով։ Այսքանը, չգիտեմ՝ կարողացա՞ տեղ հասցնել այն, ինչ ուզում էի»,- գրել է նա ու հավելել, որ մարդիկ մեկնաբանություններ չգրեն։ «Ոչ մեկին լսել չեմ ուզում։ Աստված պահապան բոլորիս»,- եզրափակել է դերասանուհին։
