«Ընկերները» սերիալի աստղ Ջենիֆեր Էնիսթոնին խիստ քննադատել են կորոնավիրուսի համավարակի պատվին տոնածառի խաղալիքի պատճառով։ Օգտատերերն այն վիրավորական են համարել մահացածների համար, այս մասին գրում է New York Post-ը։
Սերիալի 51-ամյա աստղը ինստագրամյան էջի Stories բաժնում հրապարակել է փայտե խաղալիքի լուսանկար, որի վրա գրված է «Մեր առաջին համավարակը, 2020»։ Էնիսթոնի հետևորդները նշել են, որ զարդի տեղը տոնածառի վրա չէ՝ հավելելով, որ դերասանուհին անհարգալից է վերաբերվել կորոնավիրուսի զոհերին։
«Հայտնիները համավարակի ընթացքում միայն ցույց են տվել, թե որքան կտրված են իրականությունից և թե որքան անտարբեր են ամենի հանդեպ, ինչ ուղղակիորեն իրենց հետ կապված չէ», «Ջենիֆեր Էնիսթոնն անկիրթ և անտարբեր կին է։ Ինչո՞ւ է նա կորոնավիրուսը նշում «Մեր առաջին համավարակը, 2020թ.» արտահայտությամբ։ Մարդիկ կյանքեր են կորցրել և եկամտի աղբյուրներ, և նա նշում է դա, կարծես թե պետք է ուրախանալ դրա համար։ Ամոթ քեզ, Ջենիֆեր Էնիսթոն»,- համացանցում գրել են օգտատերերը։