Բրիտանացի երաժիշտ Էլթոն Ջոնն ու դերասան Մայքլ Քեյնը հայտնվել են Մեծ Բրիտանիայի առողջապահության ազգային ծառայության գովազդում, որով հասարակությանը կոչ են անում պատվաստվել կորոնավիրուսի դեմ, հայտնում է Daily Mail-ը:
«Լոնդոնի «Չելսիի և Ուեսթմինսթերի հիվանդանոցում» նկարահանված տեսահոլովակը նպատակ ունի ցույց տալու ուրիշներին, որ պատվաստանյութն անվտանգ է», – ասվում է հայտարարության մեջ:
Տեսահոլովակում 73-ամյա Էլթոն Ջոնն ասում է. «Որքան շատ մարդիկ են պատվաստվում, այնքան մեծ է համավարակն արմատախիլ անելու հավանականությունը: Իսկապես, շատ կարևոր է իմանալ, որ պատվաստանյութերն անցել և բավարարել են անվտանգության և որակի անհրաժեշտ չափանիշները»: Տեսանյութը հրապարակվել է այն բանից հետո, երբ իշխանությունը խնդրել է 70 տարեկանից բարձր բոլոր չպատվաստված քաղաքացիներին մեկական դեղաչափ պատվաստանյութ ստանալ:
Երկուշաբթի երկրում մոտ 352 հազար մարդ պատվաստվել է վարակի դեմ՝ այդպիսով պատվաստվողների ընդհանուր թիվը հասցնելով ավելի քան 12.6 միլիոնի:
