Ուկրաինացի երգչուհի Ալինա Պաշը հայտարարել է, որ չեղարկում է «Եվրատեսիլ» երգի մրցույթին իր մասնակցությունը՝ 2015թ․-ին Ղրիմ այցելելու հետ կապված սկանդալից հետո։
Երգչուհի Ալինա Պաշը, որը հայտնվել է ուկրաինական սկանդալային «Миротворец» կայքի բազայում՝ Ղրիմ այցելելու համար, ավելի վաղ հաղթել էր «Եվրատեսիլ-2022» երգի մրցույթի Ուկրաինայի ազգային ընտրության ժամանակ:
Ուկրաինական «Суспільне»(Հանրային) հեռուստաալիքը ավելի վաղ սահմանապահ ծառայությանը հարցում էր կատարել Ալինա Պաշի թիմի կողմից Ղրիմի սահմանը հատելու վերաբերյալ, որոշվել էր նախքան տվյալներ ստանալը նրա հետ մրցույթին մասնակցելու պայմանագիր չստորագրել։
Փետրվարի 15-ին Ուկրաինայի պետական սահմանապահ ծառայության մամուլի քարտուղար Անդրեյ Դեմչենկոն հայտարարել էր, որ գերատեսչությունը Ղրիմ այցելելիս Ալինա Պաշին օրինական սահմանահատման մասին տեղեկանք չի տրամադրել։ Չորեքշաբթի Պաշը հրապարակել է պետական սահմանապահ ծառայության պատասխանը, որում նշված է, որ քաղաքացիների կողմից սահմանը հատելու մասին տեղեկատվությունը պահվում է հինգ տարի։
«Ես այդ վիրտուալ պատերազմն ու հեյթը չեմ ուզում։ Հիմա գլխավոր պատերազմը արտաքին պատերազմն է, որն իմ երկիր է եկել 2014թ․-ին։ Ես չեմ ուզում շարունակել այս կեղտոտ պատմության մեջ լինել։ Ծանր սրտով հանում եմ իմ թեկնածությունը որպես Ուկրաինայի ներկայացուցիչ «Եվրատեսիլ» մրցույթում։ Ցավոք։ Շատ եմ ցավում։ Մենք կկապվենք Հանրայինի հետ և կստորագրենք բոլոր հարկավոր փաստաթղթերը։
Առանձին ուզում եմ շնորհակալություն հայտնել բոլոր նրանց, ովքեր ինձ աջակցում և օգնում են, ովքեր լսում են իմ երգն ու կարևոր հայտարարությունը, այլ ոչ թե իմ մասին բամբասանքները։ Շնորհակալ եմ»,-չորեքշաբթի օրը Instagram-ում գրել է երգչուհին։ Նա ընդգծել է նաև, որ հետևում է Ուկրաինայի օրենքներին։
Այս տարի «Եվրատեսիլը» կանցկացվի Իտալիայի Թուրին քաղաքում, քանի որ 2021թ․-ին Ռոտերդամում մրցույթի հաղթող է դարձել Maneskin խումբը։ Մրցույթի եզրափակիչը կկայանա 2022թ․-ի մայիսի 14-ին, Իտալիայի խոշորագույն մարզահամերգային համալիրներից մեկում՝ PalaOlimpico արենայում։
