Ավելորդ քաշից ազատվելու և գեղեցիկ ու սլացիկ կազմված ձեռք բերելու մասին երազում են միլիոնավոր մարդիկ, սակայն խնդիրն այն է, որ սխալ մոտեցման դեպքում նիհարելու գործընթացը կարող է բավական երկարատև լինել կամ առհասարակ հաջողությամբ չպսակվել։ Այս խնդրի դեմ պայքարը սովորաբար մտազուգորդվում է խիստ սննդակարգերի ու հատուկ մարզումների հետ, սակայն նման մեթոդները ոչ միշտ են արդյունավետ լինում, իսկ երբեմն էլ որոշակի առողջական խնդիրների պատճառ են դառնում։ Այնուամենայնիվ մասնագետները վստահ են, որ իրականում ցանկալի արդյունքին հասնելու համար շատ մեծ ջանքեր գործադրելու կարիք չկա, քանի որ մի քանի պարզ փոփոխություն անելն անգամ կարող է շատ արդյունավետ լինել։
Բժիշկ Եկատերինա Վոլկովան ներկայացրել է 8 կանոն, որոնց պետք է հետևեն նիհարել ցանկացողները։ Մասնագետը վստահ է, որ այս կերպ հնարավոր կլինի աստիճանաբար ազատվել ավելորդ կիլոգրամներից, ինչը չի հանգեցնի սթրեսի և բացասաբար չի անդրադառնա մարդու ինքնազգացողության վրա։
Չմոռանալ նախաճաշի մասին
Նախաճաշն անչափ կարևոր է օրգանիզմի ու կազմվածքի համար, մինչդեռ շատերը մոռանում են դրա մասին։ Բանն այն է, որ բավական տևական ու առողջ քնի դեպքում մարդու օրգանիզմն օգտագործում է օրվա ընթացքում կուտակած ածխաջրերը, մինչդեռ դրանց պաշարներն առավոտյան լրացնելու փոխարեն երեկոյան լրացնելը կհանգեցնի ավելորդ ճարպաշերտերի կուտակման։
Վերահսկողության տակ պահել սննդի չափաբաժինները
Մարդու օրգանիզմը մի անգամից կարող է լիարժեք մարսել 200-300 գրամ սնունդ, մինչդեռ ավելորդ սնունդը կուտակվում է ավելորդ կիլոգրամների տեսքով։ Ընդ որում՝ տարիքի հետ այդ թիվը նվազում է, ուստի սննդի քանակը ևս հարկավոր է նվազեցնել՝ սկսելով սնվել ավելի քիչ, սակայն ավելի հաճախ։
Ուտելուց առաջ մի բաժակ գոլ ջուր խմել
Շատ հաճախ քաղցի զգացման տակ քողարկված է լինում ծարավի զգացումը, ուստի մինչև որևէ բան ուտելը կարելի է մի բաժակ գոլ ջուր կամ երիցուկով թեյ խմել։ Եթե անգամ 20 րոպե անց քաղցի զգացումը շարունակում է տանջել, ապա կարելի է որևէ բան ուտել։
Չհուսահատվել խախտումների դեպքում
Ժամանակ առ ժամանակ որոշակի խախտումներ անելը բնական է, ուստի ոչ մի դեպքում պետք չէ հուսահատվել և կրկին անառողջ սննդակարգին վերադառնալ։
Չհրաժարվել քաղցրավենիքից
Նիհարել ցանկացողներին մասնագետները խորհուրդ են տալիս ոչ թե բացառել քաղցրավենիքը, այլ սահմանափակել այն, ուտել օրվա առաջին կեսին և նախապատվությունը տալ միայն որոշակի տեսակներին։ Կազմվածքի համար առավել անվնաս կարող են լինել դառը շոկոլադը կամ ամբողջահատիկ ալյուրով պատրաստված մրգային թխուկը։
Ավելի քիչ սնվել
Եթե ֆիզիկական ակտիվությունն ու մարզումները չեն օգնում նիհարել, ապա հարկավոր է փորձել հաշվել օրվա ընթացքում օգտագործվող մթերքի կալորիականությունը։ Մեծ է հավանականությունը, որ սննդակարգում կան ավելորդ կալորիաների աղբյուրներ, որոնցից ազատվելը թույլ կտա նվազեցնել քաշը։
Հրաժարվել յուղազրկված մթերքից
Ճարպերն իրականում շատ կարևոր են օրգանիզմի համար, քանի որ դրանք անհրաժեշտ են սեռական հորմոնների ու սթրեսի հորմոնների արտադրման համար։ Սա է պատճառը, որ ճարպերը հարկավոր է սահմանափակել, սակայն ոչ մի դեպքում չբացառել։
Չհետևել քնելուց առաջ կեֆիր խմելու կամ կաթնաշոռ ուտելու խորհրդին
Երեկոյան կաթնաշաքար պարունակող մթերքի գործածությունը կարող է դառնալ օրգանիզմում խմորման գործընթացների զարգացման ու ինսուլինի մակարդակի բարձրացման պատճառ, ինչն էլ կխթանի ճարպերի կուտակումը՝ հատկապես որովայնի հատվածում։
Նյութի աղբյուրը՝ med2.ru
