Փարթամ, առողջ ու փայլուն վարսեր ունենալու մասին շատերն են երազում, սակայն շատ հաճախ սխալ խնամքը, վատ սննդակարգը, մազերի հարդարման վնասակար միջոցների գործածությունն ու արտաքին միջավայրի անբարենպաստ պայմանները բացասաբար են անդրադառնում մազերի որակի, աճի ու տեսքի վրա, ինչի հետևանքով դրանք վնասվում են, թուլանում, նոսրանում ու կորցնում են առողջ փայլը։
Նման խնդիրներից խուսափելու և մազարմատներն ամրապնդելու համար հարկավոր է ինչպես հարկն է սնուցել մազերն անհրաժեշտ նյութերով։ Որպես կանոն մարդիկ կիրառում են հատուկ դիմակներ ու կոնդիցիոներներ, սակայն դրանք պարունակում են քիմիական վնասակար տարրեր և ոչ միայն անարդյունավետ են լինում, այլև կարող են էլ ավելի վատթարացնել մազերի վիճակը։ Սա է պատճառը, որ մասնագետները հորդորում են խուսափել պատրաստի խնամքի միջոցներից և նախապատվությունը տալ բնական հասանելի միջոցներին, որոնց շարքին կարող են դասվել նաև որոշ յուղեր։
Յուղերն առհասարակ օգտակար սննդարար նյութերի ու վիտամինների հարուստ աղբյուր են, ինչի շնորհիվ կարող են օգտակար լինել ամենատարբեր իրավիճակներում, այդ թվում նաև մազերի խնամքի համար։ MedikForum.ru կայքը ներկայացրել է լավագույն յուղերը մազերի խնամքի համար, որոնք կօգնեն սնուցել, ամրապնդել ու վերականգնել մազարմատները և յուրահատուկ փայլ կհաղորդեն դրանց։
Կոկոսյան ընկույզի յուղ
Կոկոսյան ընկույզի յուղը լայն կիրառում ունի կոսմետոլոգիայում և վարսերի խնամքը ևս բացառություն չէ։ Այն խոնավացնում է մազերը, հագեցնում է դրանք օգտակար նյութերով և դարձնում է ավելի նուրբ ու ենթարկվող։ Բացի այդ, այն նաև պաշտպանում է արևի վնասակար ճառագայթներից ու հանգստացնում է գլխամաշկը։ Սակայն հարկ է հիշել, որ որպես դիմակ կիրառելու դեպքում կոկոսյան ընկույզի յուղը չի կարելի շատ երկար թողնել մաշկին։
Ժոժոբայի յուղ
Ժոժոբայի յուղը հիանալի միջոց է մազերը խնամելու և վերականգնելու համար։ Այս յուղի գործածությունը թույլ է տալիս խուսափել մազերի վաղաժամ ճերմակումից, դարձնում է վարսերը շատ ավելի հարթ ու առողջ փայլ է հաղորդում դրանց։
Կտավատի յուղ
Կտավատի յուղը պարունակում է վիտամիններ, հանքանյութեր, չհագեցած ճարպեր ու ֆերմենտներ, ինչով էլ հենց բացատրվում է դրա օգտակարությունը վարսերի համար։ Այն լավագույն խնամքի միջոցը կարող է լինել բաց գույն ունեցող, բարակ ու հաճախ ճյուղավորվող մազերի համար, քանի որ դրա շնորհիվ կարելի է սնուցել մազերն ամբողջ երկայնքով։ Արդյունքում վարսերն ավելի առողջ, գեղեցիկ ու փարթամ տեսք կստանան և կդառնան ավելի առաձգական ու ենթարկվող։
Ձիթայուղ
Ձիթայուղը շատ տարածված ու օգտակար բաղադրիչ է, որը կիրառվում է ամենատարբեր աղցանների ու ուտեստների պատրաստման համար, սակայն այն կարող է նաև հիանալի խնամքի միջոց լինել։ Այս յուղը հարուստ է А, Е, D վիտամիններով, ինչպես նաև ճարպաթթուներով, հակաօքսիդանտներով ու պոլիֆենոլներով, որոնք օգնում են վարսերին շատ ավելի առողջ ու խնամված տեսք հաղորդել։ Այս յուղը վերականգնում է մազերը, ամրապնդում է մազարմատներն ու խթանում է դրանց աճը։
Արգանի յուղ
Արգանի յուղն անչափ օգտակար է մազերի առողջության ու գեղեցկության համար, ուստի այն նույնպես կարող է հիանալի միջոց լինել վարսերի խնամքի համար։ Այս յուղը 80%-ով բաղկացած է օգտակար ճարպաթթուներից, իսկ մյուս մասը վիտամիններն են ու հակաօքսիդանտները։ Դրա գործածությունը կարող է շատ օգտակար լինել ներկված մազերի դեպքում, քանի որ այն պահպանում է գույնը, օգնում է խոնավացնել մազերն ու առաձգականություն է հաղորդում դրանց։ Արգանի յուղը կարող է բավական թանկարժեք լինել, սակայն այն հիանալի արդյունք է ապահովում, ուստի համարվում է լավագույններից մեկը։
Շիի յուղ
Շիի յուղը պարունակում է օգտակար ճարպաթթուներ, A, D, E և F վիտամիններ, ինչպես նաև ֆիտոստերոլներ։ Այս յուղի գործածությունը նպաստում է մազերի վերականգնմանը, սնուցում է, դարձնում է շատ ավելի նուրբ ու ենթարկվող, ինչպես նաև պաշտպանում է մազերն ուլտրամանուշակագույն ճառագայթների վնասակար ազդեցությունից։
Խաղողի յուղ
Խաղողի յուղը հիանալի միջոց է յուղոտ մազերի խնամքի համար, քանի որ դրա գործածությունը կարգավորում է սեբումի արտադրությունն ու վերականգնում է գլխամաշկի տոնուսը։ Արդյունքում մազերն ավելի երկար են պահպանում իրենց թարմությունն ու ուշ են կեղտոտվում։ Բացի այդ, այս յուղը վերականգնում է վարսերը ներկելուց հետո և պաշտպանում է արևի վնասակար ճառագայթներից ու արտաքին միջավայրի այլ վնասակար գործոններից։
