Մայամիում մեծ շուքով նշվեց «Ինտեր Մայամիի» սեփականատեր Դևիդ Բեքհեմի 50-ամյակը։ Միջոցառմանը ներկա էին նրա կինը՝ Վիկտորիա Բեքհեմը, ինչպես նաև երեխաները՝ Ռոմեոն, Կրուզը և Հարփերը։ Սակայն ավագ որդին՝ Բրուքլինը, բացակայում էր։
Տոնակատարությանը մասնակցեցին նաև Լեո Մեսսին կնոջ՝ Անտոնելա Ռոկուցոյի հետ, ինչպես նաև Լուիս Սուարեսն ու նրա կինը՝ Սոֆիա Բալբին։ Հրավիրված էին նաև «Ինտեր Մայամիի» այլ աստղեր՝ Ժորդի Ալբան և Սերխիո Բուսկետսը։ Երեկույթին ներկա էին նաև NFL-ի լեգենդ Թոմ Բրեյդին և NBA-ի աստղ Շաքիլ Օ’Նիլը:
«Մտածեցի, որ պետք է մի փոքր շուտ սկսեմ տոնակատարությունները։ Անչափ յուրահատուկ երեկո Մայամիում։ Շատ բախտավոր եմ, որ ունեմ հիասքանչ ընկերներ ու ընտանիք, ում հետ կարող եմ սկսել 50-ամյակի տոնակատարությունները»,- գրել է Բեքհեմն Instagram-ի իր էջում։
Բեքհեմը, ով ծնվել է 1975 թվականի մայիսի 2-ին, կարիերայի ընթացքում հանդես է եկել «Մանչեսթեր Յունայթեդում», «Ռեալ Մադրիդում», «Միլանում», ՊՍԺ-ում և «Լոս Անջելես Գելաքսիում»՝ դառնալով Անգլիայի, Իսպանիայի և Ֆրանսիայի չեմպիոն, ինչպես նաև 1999թ․ Չեմպիոնների լիգայի հաղթող։
