Գերմանիայի նախագահ Ֆրանկ-Վալտեր Շտայնմայերի և նրա կնոջ՝ Էլկե Բուդենբենդերի այցի պատվին Վինձորի ամրոցում տեղի է ունեցել պետական ճաշկերույթ: Միջոցառմանը ներկա էին պետությունների ղեկավարներ, թագավորական ընտանիքի անդամներ և այլ հյուրեր, այդ թվում՝ արքայազն Ուիլյամը և նրա կինը՝ Քեյթ Միդլթոնը, թագավոր Չարլզ III-ը և թագուհի Կամիլան, թագուհի Եղիսաբեթ II-ի քույրը՝ արքայադուստր Աննան, սուպերմոդել Կլաուդիա Շիֆերը և Մեծ Բրիտանիայի վարչապետ Քիր Սթարմերը։
43-ամյա Քեյթ Միդլթոնը ճաշկերույթին ներկայացել էր փայլուն զգեստով՝ Ջենի Փեքհեմի թիկնոցով, սակայն գլխավոր իրադարձությունը թագուհի Վիկտորիայի հավաքածուից հազվագյուտ թագն էր՝ Ուելսի արքայադստեր կողմից երբևէ կրածներից ամենամեծը: Արևելյան շրջանաձև թագը, որը պատրաստվել է 1853 թվականին, զարդարված է ադամանդներով և ռուբիններով՝ փայլուն լոտոսների և մողոլական ոճի կամարների տեսքով: Եղիսաբեթ II թագուհին այս զարդը մի անգամ կրել է 2005 թվականին Մալթա կատարած իր այցի ժամանակ։
Արքայազն Ուիլյամը, Չարլզ III թագավորը, Գերմանիայի նախագահը և խնջույքին ներկա այլ պարոնայք սպիտակ թիթեռնիկներ էին կրում՝ համապատասխան միջոցառման հագուստի կանոնակարգին, մինչդեռ կանայք շքեղ տեսք ունեին երեկոյան զգեստներով։ Օրինակ՝ 55-ամյա Կլաուդիա Շիֆերը Balmain-ի ոսկե փայլերով և թանկարժեք քարերով ասեղնագործված սև զգեստ էր հագել։
