Մալայզիայի թագավոր սուլթան Աբդուլլա Ռիյաթուդին Ալ-Մուստաֆան և թագուհի Ազիզա Ամինա Մայմունա Իսկանդերիան կարանտինային ռեժիմում են գտնվում: Նրանք կորոնավիրուսի առկայությունը ստուգող թեստ են հանձնել, երբ թագավորական պալատի որոշ աշխատակիցների մոտ վարակ է հայտնաբերվել, հայտնում է The Star-ը՝ հղում տալով թագավորական պալատի բյուրոյի հայտարարությանը։
«Թեստերի պատասխանները բացասկան են, սակայն նրանք պետք է երեկ սկսված կարանտինային ռեժիմը 14 օր պահպանեն»,- ասվում է պալատի գլխավոր տեսուչ Ահմադ Ֆադիլ Շամսուդինի հայտարարությունում։
Ներկայում Մալայզիայի առողջապահության նախարարության տեղեկությունների համաձայն՝ երկրում կա 1796 վարակակիր։ Հիվանդությունից ապաքինվել 199 մարդ, մահացել՝ 21 հոգի։
Երկրում վարակման դեպքերի մեծ մասը կապված է մուսուլմանական կրոնական արարողության հետ, որը տեղի է ունեցել Կուալա-Լումպուրի մզկիթներից մեկում՝ փետրվարի 27-ից մարտի 3-ն ընկած ժամանակահատվածում: Միջոցառմանը մասնակցել է ավելի քան 16 000 մարդ։
