Սննդամթերքի տեսակներ, որոնք օգնում են ազատվել ավելորդ քաշից ու խուսափել քաղցի զգացումից

Ավելորդ քաշը ներկայում շատ տարածված խնդիր է, որից չազատվելը կարող է բավական վտանգավոր լինել: Բանն այն է, որ ճարպակալումն ու ավելորդ քաշի բարձրացնում են մի շարք լուրջ հիվանդությունների զարգացման հավանականությունը, ուստի զարմանալի չէ, որ մասնագետները հորդորում են օր առաջ ազատվել ավելորդ այս խնդրից ու կարգի բերել կազմվածքը։

Սննդաբանները մշակել են բազմաթիվ արդյունավետ սննդակարգեր, որոնք օգնում են շատ արագ կարգի բերել կազմվածքն ու ազատվել ավելորդ քաշից, սակայն կողմնակի բարդություններից և կորցրած կիլոգրամների վերադարձից խուսափելու համար մասնագետները խորհուրդ են տալիս աստիճանաբար նվազեցնել քաշը ճիշտ ու բալանսավորված սննդակարգի միջոցով՝ դրանում ներառելով օգտակար ու հագեցնող սննդամթերքի տեսակներ, որոնք նպաստում են ավելորդ ճարպի այրմանն ու չեն հանգեցնում քաշի ավելացման։

Medikforum.ru կայքը, հղում անելով ngs42.ru-ին, ներկայացրել է 5 մթերք, որոնք սննդակարգում ներառելը կօգնի պայքարել ավելորդ կիլոգրամների դեմ ու հեշտությամբ կարգի բերել կազմվածքը։

Բանջարեղեն

Բանջարեղենը մանրաթելերի հարուստ աղբյուր է, իսկ դրանք ուռչում են մարսողական տրակտում և դանդաղեցնում են ածխաջրերի յուրացման գործընթացը, ինչի շնորհիվ էլ հագեցածության զգացումը պահպանվում է բավական երկար ժամանակ, ախորժակը նվազում է և մարդը սովորականից շատ ավելի քիչ սնունդ է օգտագործում։ Ֆիթնես-մարզիչ Արտյոմ Սավինի խոսքով՝ ավելորդ քաշից ազատվելու համար հարկավոր է սննդակարգում ներառել կանաչ գույն ունեցող բանջարեղենի տեսակներ, քանի որ դրանք ավելի լավ են յուրացվում և խթանում են նյութափոխանակության համակարգի աշխատանքը։

Ընկույզները

Ընկույզների ընդամենը մի փոքր բաժինը կօգնի ազատվել քաղցի նոպաներից։ Այս մթերքը պարունակում է ճարպեր ու սպիտակուցներ՝ երկու բաղադրիչ, որոնք բավական շատ էներգիա են տալիս, ինչը նպաստում է նյութափոխանակության ակտիվացմանը։ Միևնույն ժամանակ դրանք մարսելու ու յուրացնելու համար երկար ժամանակ է պահանջվում։ Թեթև քաղցը հագեցնելու համար օգտագործով վնասակար մթերքը ընկույզներով փոխարինելու դեպքում կարելի է շատ ավելի արագ կարգի բերել կազմվածքը։ Սակայն հարկ է հիշել, որ օրական կարելի է օգտագործել առավելագույնը 30-40 գրամ ընկույզ։

Պանիրներ

Պանրի պինդ տեսակները պարունակում են մեծ քանակությամբ կալցիում, որը նիհարել ցանկացողների համար լավագույն հանքանյութն է։ Օրական կարելի է ուտել մինչև 50 գրամ պինդ պանիր, ինչը շատ օգտակար կլինի ինչպես առողջության, այնպես էլ կազմվածքի համար։ Բացի այդ, կարելի է նաև օգտագործել սպիտակ պանիրներ (տոֆու, ռիկոտա, մոցարելա և այլն), որոնք հարուստ են սպիտակուցներով, ինչի շնորհիվ բավական երկար ժամանակով ազատում են քաղցի զգացումից ու ամրապնդում են մկանային հյուսվածքները։ Մարզիչ Վիկտորյա Յաբլոկովան խորհուրդ է տալիս սննդակարգում անպայման ներառել սպիտակուցներ ու ճարպեր (մեկական գրամ մարմնի զանգվածի յուրաքանչյուր կիլոգրամի դիմաց)։ Ընդ որում՝ ճարպերի մեծ մասը պետք է լինի բուսական ծագման, մինչդեռ կենդանական ծագման ճարպերը հարկավոր է օգտագործել խիստ չափավոր։ Ինչ վերաբերում է ածխաջրերին, ապա մասնագետը խորհուրդ է տալիս ստանալ դրանք հացահատիկներից, բանջարեղենից ու մրգերից։

Թթու կաղամբ

Բժիշկ-սննդաբան Իրինա Տորոպիգինայի խոսքով՝ այս մթերքը հարուստ է պրոբիոտիկներով, որոնք նպաստում են քաշի նվազման, ինչպես նաև բարելավում են աղիների միկրոֆլորան ու աղեստամոքսային տրակտի աշխատանքը։ Բացի այդ, այն հարուստ է նաև մանրաթելերով, որոնք նույնպես շատ կարևոր են։ Առողջ հասուն մարդուն խորհուրդ է տրվում օրական մինչև 150 գրամ թթու կաղամբ ուտել։

Ճարպայուղ

Խոզի ճարպայուղն ունի շատ բարձր կալորիականություն, սակայն այն հարուստ է հագեցած թթուներով, որոնք շատ արագ հագեցնում են ու երկար ժամանակով ազատում են քաղցի զգացումից։ Բավական փոքր կտոր ճարպայուղն օգնում է խուսափել ավելորդ մթերքի գործածությունից, ինչը շատ կարևոր է նիհարել ցանկացողների համար։ Առողջ մարդն օրական կարող է մինչև 30 գրամ ճարպայուղ օգտագործել, մինչդեռ խոլեստերինի մակարդակի բարձրացման դեպքում այդ չափաբաժինը չպետք է գերազանցի 10 գրամը։