Առողջ, նուրբ ու խնամված մաշկ ունենալու համար հարկավոր է անպայման սնուցել ու խոնավացնել այն համապատասխան դիմակներով, սակայն խնդիրն այն է, որ պատրաստի կոսմետիկ միջոցները պարունակում են մի շարք կողմնակի բաղադրիչներ, որոնք կարող են անցանկալի ալերգիկ ռեակցիաներ առաջացնել: Նման տհաճ հետևանքներից խուսափելու համար մասնագետները խորհուրդ են տալիս նախապատվությունը տալ բնական դիմակներին, որոնք և ավելի անվնաս են, և ավելի հասանելի:
Բանանով ու մեղրով դիմակ
Անհրաժեշտ է.
- 2 ճաշի գդալ բանանի խյուս,
- 1 թեյի գդալ մեղր,
- 1 ճաշի գդալ նարնջի հյութ (ըստ ցանկության):
Օգտագործման եղանակը.
Բոլոր բաղադրիչները լավ խառնել, քսել մաքուր մաշկին և թողնել 20 րոպե: Լվանալ մաշկը գոլ ջրով և չորացնել նուրբ սրբիչով: Այս խառնուրդը համարվում է մաշկը սնուցելու և խոնավացնելու լավագույն միջոցներից մեկը:
Հալվեով ու վարունգով դիմակ
Անհրաժեշտ է.
- հալվեի 1 տերև,
- 1 հատ փոքր վարունգ:
Օգտագործման եղանակը.
Բոլոր բաղադրիչները կոտորակիչով լավ մանրացնել, այնուհետև քսել մաշկին ու մի փոքր մերսել: Թողնել դիմակը կես ժամ, այնուհետև լվացվել սառը ջրով ու չորացնել մաշկը նուրբ սրբիչով: Այս դիմակը ոչ միայն սնուցում է մաշկը, այլև խոնավեցնում է, բուժում մաշկային խնդիրներն ու օգնում կանխել մաշկի վաղաժամ ծերացումը:
Խմորիչով ու մեղրով դիմակ
Անհրաժեշտ է.
- 1 ճաշի գդալ գարեջրի խմորիչ,
- 1 թեյի գդալ մեղր,
- 1 ճաշի գդալ գոլ կաթ:
Օգտագործման եղանակը.
Բոլոր բաղադրիչները խառնել, այնուհետև ստացված զանգվածը քսել մաշկին ու թողնել 15 րոպե: Լվանալ մաշկը գոլ ջրով և չորացնել նուրբ սրբիչով: Այս դիմակը պարունակում է մի շարք կարևոր վիտամիններ ու հանքանյութեր, ինչի շնորհիվ օգնում է պահպանել մաշկի առողջությունը, սնուցում ու խոնավեցնում է այն և կանխում է կնճիռների առաջացումը:
