Անցյալ տարվա նոյեմբերին հայտնի դարձավ 45-ամյա Ջեյսոն Սուդեյկիսի ու 36-ամյա Օլիվիա Ուայլդի բաժանման մասին, և այժմ նրանք երկուսն էլ նոր կյանք են սկսել: Եվ մինչ Օլիվիան վայելում էր սիրավեպը 27-ամյա երգիչ Հարի Սթայլսի հետ, Ջեյսոնն իր երջանկությունը գտավ 34-ամյա բրիտանացի դերասանուհի և մոդել Քիլի Հազելի գրկում: Սուդեյկիսը և Հազելը իրար ճանաչում են երկար տարիներ (2014-ին նրանք միասին նկարահանվել են «Անտանելի տնօրենները 2» կատակերգությունում), բայց միայն վերջերս նրանց շփումը վերաճեց ռոմանտիկ հարաբերությունների: Ինսայդերները ասում են, որ Ջեյսոնին միշտ դուր էր գալիս Քիլին, բայց նրանք մտերմացան միայն այն բանից հետո, երբ դերասանը բաժանվեց իր երկու երեխաների մորից:
