Ավելորդ քաշից ազատվելու և կազմվածքն ավելի սլացիկ դարձնելու մասին շատերն են երազում, սակայն ոչ բոլորին է հաջողվում հասնել ցանկալի արդյունքին: Ներկայում կան բազմաթիվ սննդակարգեր, որոնք օգնում են նվազեցնել քաշն ու ազատվել ավելորդ ճարպաշերտերից, սակայն դրանցից ոչ բոլորն են թույլ տալիս նիհարել կարճ ժամանակահատվածում, իսկ որոշներն էլ կարող են անգամ առողջական լուրջ խնդիրներ առաջացնել: Սա է պատճառը, որ մասնագետները հորդորում են նախապատվությունը տալ փորձված դիետաներին, որոնք չեն առաջացնի կողմնակի բարդություններ և կօգնեն ընդամենը մի քանի օրում հասնել զգալի արդյունքի:
Ձեր ուշադրությանն ենք ներկայացնում 4 օր տևողությամբ երկու էքսպրես-դիետա, որոնց օգնությամբ կարելի է կարգի բերել կազմվածքն ու նվազեցնել քաշն առանց լուրջ ջանքեր գործադրելու: Ավելին՝ այս դիետաները ոչ միայն չեն առաջացնի առողջական խնդիրներ, այլև կօգնեն մաքրել օրգանիզմը տոքսիններից ու շլակներից՝ բարելավելով առողջական վիճակն ու ինքնազգացողությունը:
Դիետա «Չորս բեռնաթափման օր»
Այս քառօրյա սննդակարգը բավական խիստ է ու սահմանափակ և ենթադրում է սննդամթերքի միայն 4 տեսակի և 4 ըմպելիքի գործածություն: Փոխարենը նշված մթերքը կարելի է ուտել անսահմանափակ քանակությամբ: Հարկ է հիշել, որ այս սննդակարգին հետևելու ընթացքում մթերքն ու ըմպելիքները հարկավոր է օգտագործել առանց աղի ու շաքարավազի: Այս դեպքում սնունդը կարող է մի փոքր անսովոր և անգամ տհաճ լինել, սակայն սննդակարգը շատ ավելի արդյունավետ կլինի և կօգնի հասնել հիանալի արդյունքի:
Սննդակարգը.
- 1-ին օրը կարելի է ուտել միայն խաշած բրինձ ու խմել թարմ քամած խնձորի հյութ:
- 2-րդ օրը թույլատրվում է միայն հավի խաշած փափկամիս, խնձորի հյութ ու կանաչ թեյ:
- 3-րդ օրը հարկավոր է սնվել միայն անյուղ կաթնաշոռով ու անյուղ կեֆիրով:
- 4-րդ օրը թույլատրվում է ցանկացած տեսակի անյուղ կաթնային պանիր ու կանաչ թեյ:
Դիետա «Ամառ»
Այս սննդակարգը շատ ավելի արդյունավետ կլինի ամռանը կիառելու դեպքում, քանի որ տարվա այդ եղանակին կարելի է գտնել տարատեսակ մրգեր ու բանջարեղեն, որոնք էլ սննդակարգի հիմնական բաղադրիչներն ե: Այս դիետան կօգնի ընդամենը 4 օրում հեշտությամբ ազատվել 2-3 կգ ավելորդ քաշից, ուստի այն հիանալի միջոց է որևէ միջոցառմանն ընդառաջ կազմվածքը կարգի բերելու համար: Բացի այդ, այս սննդակարգը դուրս է բերում բոլոր վնասակար նյութերն օրգանիզմից՝ նպաստելով նաև առողջական վիճակի բարելավմանը:
Սննդակարգը.
- 1-ին օրը կարելի է ուտել միայն մրգեր ու խմել բնական թարմ քամած հյութեր:
- 2-րդ օրը ցանկալի է նախապատվությունը տալ միայն բուսական թեյերին (ազնվամորի, երիցուկ, սրոհունդ և այլն), որոնց պատրաստման համար անհրաժեշտ դեղաբույսերը կարելի է գնել դեղատներից:
- 3-րդ օրը խորհուրդ է տրվում սնվել բանջարեղենով: Ընդ որում՝ բանջարեղենը կարելի է ուտել ինչպես հում վիճակում, այնպես էլ շոգեխաշած:
- 4-րդ օրը հարկավոր է սնվել կաղամբի տարբեր տեսակներից պատրաստված բանջարեղենային արգանակով (կաղամբ, ծաղկակաղամբ, բրոկոլի, բրյուսելյան կաղամբ և այլն), որին կարելի է ավելացնել նաև պղպեղ, սոխ, մաղադանոս ու սխտոր: Ընդ որում՝ այս արգանակը կարելի է խմել անսահմանափակ քանակությամբ:
Այս դիետաներն անչափ արդյունավետ են և օգնում են կարճ ժամանակահատվածում հասնել հիանալի արդյունքի, սակայն հարկ է հիշել, որ հետագայում նախկին սննդակարգին վերադառնալու և անառողջ կենսակերպ վարելու դեպքում կորցրած կիլոգրամները շատ արագ կվերականգնվեն: Արդյունքը պահպանելու և քաշի ավելացումից խուսափելու համար հարկավոր է առաջին հերթին կարգի բերել սննդակարգը, հրաժարվել անառողջ սննդից ու վատ սովորություններից, վարել առողջ կենսակերպ ու լինել ֆիզիկապես ակտիվ:
