Բրիտանացի հայտնի ռեժիսոր Ռիդլի Սքոթը նոր նախագծի շրջանակում կհամագործակցի հայտնի սցենարիստ Սթիվեն Նայթի հետ․ նրանք նախատեսում են Երկրորդ համաշխարհային պատերազմի մասին պատմող տասը մասից բաղկացած սերիալ ստեղծել։
Ինչպես հաղորդում է Deadline, «Ճանապարհներ դեպի ազատություն» (Roads to Freedom) սերիալի սցենարի հիմքում ընկած կլինեն բրիտանացի պատմաբան Էնթոնի Բիվորի՝ Երկրորդ համաշխարհային պատերազմի մասին պատմող գրքերը: Բիվորը ոչ միանշանակ հեղինակություն է վայելում Ռուսաստանում. շատերը նրան մեղադրում են ԽՍՀՄ-ի նկատմամբ կողմնակալության և Կարմիր բանակի մասին կարծրատիպեր տարածելու համար։
Սցենարի ստեղծման հարցում Նայթը կհամագործակցի Բիվորի հետ։
Սերիալի նախագիծը դեռևս չի ստացել հեռուստաընկերությունների կամ սթրիմինգային ծառայությունների պաշտոնական աջակցությունը: Հայտնի չէ ոչ միայն հնարավոր պրեմիերայի ամսաթիվը, այլև նկարահանումների մեկնարկի ամսաթիվը։ Հայտնի չէ նաև սերիալի դերասանական կազմը։
