Դերասան, բեմադրիչ, ՀՀ արվեստի վաստակավոր գործիչ Վիգեն Ստեփանյանի հիշատակին Հայաստանի կինեմատոգրաֆիստների միությունը Երևանում կկազմակերպի «Տղաս, ո՞ւր է Եփրատը» ֆիլմի պրեմիերան:
Կինոցուցադրությունը տեղի կունենա ապրիլի 2-ին Կինոյի տան մեծ դահլիճում: Վիգեն Ստեփանյանը սցենարի հեղինակ, ռեժիսոր և պրոդյուսեր Ռուբեն Փաշինյանի «Տղաս, ո՞ւր է Եփրատը» կինոնկարի գլխավոր դերում խաղացել է 2016 թվականին:
Ֆիլմն ունեցել է բազմաթիվ արտերկրյա ցուցադրություններ, շրջել փառատոներով, արժանացել մրցանակների: Յալթայի կինոփառատոնում Վիգեն Ստեփանյանն արժանացել է մրցանակի «Տղամարդու լավագույն դերի համար»:
«Վիգեն Ստեփանյանն իր մեծ մասնակցությունն է ունեցել ֆիլմի թե՛ բեմադրական աշխատանքներին, թե՛ թարգմանել է սցենարը արևմտահայերեն: Ցավոք, ֆիլմի հայաստանյան մեծ պրեմիերան տեղի է ունենում առանց Վիգեն Ստեփանյանի: Եվ մենք այն նվիրում ենք Վիգեն Ստեփանյանի հիշատակին»,-ասվում է միության տարածած հաղորդագրության տեքստում:
«Տղաս, ո՞ւր է Եփրատը» ֆիլմն այն մասին է, թե դեպի ո՞ւր ենք մենք գնում: Այն անդրադառնում է Հայոց ցեղասպանությանը, բայց կինոնկարում չկան զարհուրելի տեսարաններ, չկան արցունքներ: Այս ֆիլմը հիշելու, չմոռանալու, բայց և ապրելու մասին է: Կինոնկարի բեմադրող օպերատորը Հակոբ Կարանֆիլյանն է, ֆիլմում նկարահանվել են Արտաշես Շահվերդյանը, Քրիստինա Զամինյանը, Կարինե Ջանջուզազյանը, Իշխան Ղարիբյանը, Սամվել Դանիելյանը, Յուրի Իգիթխանյանը, Մանուկ Հախվերդյանը, Գրիգոր Բաղդասարյանը և այլ դերասաններ: Այն նկարահանվել է Ռուբեն Փաշինյանի «Տղաս, ո՞ւր է Եփրատը» պատմվածքի հիման վրա: Փաշինյանը գլխավոր դերակատար է: