Ներկայում մարդկության ամենաառաջնային խնդիրներից մեկն է համարվում ճարպակալումը, որը կարող է դառնալ բազմաթիվ լուրջ հիվանդությունների, այդ թվում նաև քաղցկեղի տարբեր տեսակների և սրտանոթային հիվանդությունների առաջացման պատճառ: Ավելորդ քաշը լուրջ ծանրաբեռնվածություն է ամբողջ օրգանիզմի համար, ուստի զարմանալի չէ, որ սննդաբանները հորդորում են հնարավորինս արագ ազատվել այդ խնդրից և պահել մարմնի զանգվածի ինդեքսը նորմայի սահամաններում:
Գոյություն ունեն բազմաթիվ դիետաներ ու վարժությունների համալիրներ, որոնք մշակված են ամենատարբեր դեպքերի համար, ինչը նշանակում է, որ անկախ անհատական առանձնահատկություններից յուրաքանչյուրն էլ կարող է գտնել որևէ միջոց ավելորդ քաշից ազատվելու համար, սակայն խնդիրն այն է, որ սա բավական երկարատև ու հոգնեցուցիչ գործընթաց է, իսկ կամքի ուժ ու համբերություն ոչ բոլորն ունեն: Սա է պատճառը, որ երբեմն մարդիկ չեն հասնում իրենց նպատակին: Նման դեպքերում հարկավոր է հավելյալ խթան, որը կարագացնի այդ գործընթացը և ավելի բազմազան ու հետաքրքիր կդարձնի դիետիկ սննդակարգը:
Ամերիկացի մասնագետների խոսքով՝ ճարպերի այրման գործընթացն արագացնելու համար հարկավոր է ակտիվացնել նյութափոխանակությունը, իսկ այս հարցում հիանալի օգնական կարող են լինել բնական հյութերը, որոնցից որոշները ոչ միայն շատ համեղ են ու առողջարար, այլև շատ օգտակար են կազմվածքի համար:
Ճարպերն այրելու և միաժամանակ կազմվածքին ու առողջությանը վնաս չհասցնելու համար հիանալի տարբերակ է տոմատի հյութը: Այս հյութի 100 գրամում պարունակվում է ընդամենը 18 կալորիա: Բացի այդ, լոլիկները պարունակում են մեծ քանակությամբ ջուր, ինչն օգնում է կանխել օրգանիզմի ջրազրկումը:
Ոչ պակաս համեղ ու օգտակար է նաև խնձորի հյութը, սակայն այն պետք է լինի միայն թարմ քամած և առանց հավելումների: Խնձորի հյութի 100 գրամում պարունակվում է 50 կալորիա, սակայն այն նաև հարուստ է մի շարք կարևոր վիտամիններով ու հանքանյութերով:
Առաջատար եռյակը եզրափակում է գազարի հյութը, որի 100 գրամում պարունակվում է 40 կալորիա և 3 գրամ անչափ օգտակար աննդային մանրաթելեր:
Այս հյութերը հիանալի միջոց են օրգանիզմը տոքսիններից մաքրելու և փոխարենը սննդարար նյութերով հարստացնելու համար: Դրանք կօգնեն խթանել նյութափոխանակությունն ու արագացնել ավելորդ քաշից ազատվելու գործընթացը:
