Ավելորդ քաշից ազատվելու համար մարդիկ դիմում են տարատեսակ դիետաների օգնությանը, սակայն անգամ ցանկալի արդյունքին հասնելու դեպքում շատերը կրկին գիրանում են նախկին սննդակարգին վերադառնալուց հետո: Նման տհաճ անակնկալներից խուսափելու համար մասնագետները հորդորում են հետևել սննդակարգին ու բացառել որոշակի մթերքի գործածությունը, քանի որ դրանք նպաստում են քաշի ավելացմանը:
Սննդաբանները ներկայացրել են սննդամթերքի այն տեսակները, որոնցից հարկավոր է հրաժարվել ավելորդ քաշից ազատվելու համար: Այս ցանկում առաջատարը հացն ու հացաբուլկեղենն են, որոնց պատրաստման համար կիրառվում են կալցիումի պրոպիոնատ և սորբինաթթու: Այս նյութերը երկարացնում են սննդի պիտանելիության ժամկետը, սակայն միաժամանակ հանգեցնում են քաշի ավելացման:
Քաշի ավելացմանը նպաստող մթերքի շարքին են դասվել նաև տարատեսակ համային հավելումներով սփրեդի տեսակները, որոնք պարունակում են ճարպերով ու շաքարով հարուստ սոյայի լեցիտին: Բացի այդ, մասնագետները հորդորում են հրաժարվել նաև ձկան ձողիկներից, քանի որ դրանք հարուստ են լինում մեծ քանակությամբ աղով ու ճարպերով: Նման մթերքի փոխարեն խորհուրդ է տրվում օգտագործել թարմ ձուկ:
Նիհարել ցանկացողներին խորհուրդ է տրվում հրաժարվել նաև արագ պատրաստվող լապշայից, քանի որ այն պարունակում է կոնսերվանտներ: Բացի այդ, կազմվածքի համար վնասակար են համարվում նաև յոգուրտները, որոնց հաճելի համ հաղորդելու համար կիրառվում են մեծ քանակությամբ շաքար ու բուրավետիչներ: